اسرائیل کی جانب سے حماس کے عسکری ونگ القسام بریگیڈز کے نئے سربراہ محمد عودہ کو غزہ سٹی میں ایک فضائی حملے میں شہید کرنے کا دعویٰ کیا گیا ہے۔
اسرائیلی حکام کی جانب سے جاری بیان میں بتایا گیا کہ غزہ سٹی میں 26 مئی کی شب ایک فضائی حملے میں حماس کے نئے عسکری سربراہ محمد عودہ کو شہید کیا گیا۔
حماس کی جانب سے فی الحال اس حوالے سے تصدیق یا تردید کے لیے کوئی بیان جاری نہیں کیا گیا۔
محمد عودہ حماس کے سابق انٹیلی جنس سربراہ تھے اور انہیں عزالدین الحداد کی شہادت کے بعد القسام بریگیڈز کا سربراہ بنایا گیا تھا۔
عز الدین الحداد مئی کے شروع میں ایک اسرائیلی حملے میں شہید ہوئے تھے، مگر حماس کی جانب سے محمد عودہ کو نیا سربراہ مقرر کرنے کی تصدیق نہیں کی گئی تھی۔
اسرائیلی وزیر دفاع Isreal Katz نے ایکس (ٹوئٹر) پوسٹ میں کہا کہ حماس کے عسکری ونگ کے سربراہ کو غزہ میں نشانہ بنایا گیا۔
اسرائیلی فوج کی جانب سے بھی ایک بیان میں دعویٰ کیا گیا کہ محمد عودہ کو کئی ماہ کی انٹیلی جنس مانیٹرنگ کے بعد نشانہ بنایا گیا۔
غزہ کے الشفا اسپتال کے ذرائع نے الجزیرہ کو بتایا کہ غزہ سٹی کے مغربی حصے میں 26 مئی کی شب اسرائیلی حملے میں 6 افراد شہید اور 20 زکمی ہوئے۔
میڈیا رپورٹس کے مطابق اسرائیل کی جانب سے شہر کے گنجان حصے کو اس وقت نشانہ بنایا گیا جب شہری عید الاضحیٰ کی تیاریاں کر رہے تھے اور حملے سے بہت زیادہ تباہی ہوئی۔
رپورٹس میں بتایا گیا کہ مقامی وقت کے مطابق رات ساڑھے 9 بجے غزہ سٹی میں 3 بڑے دھماکے ہوئے اور یہ حملہ مارکیٹوں اور متعدد دکانوں والے علاقے میں ہوا، جہاں لوگ عید کی خریداری میں مصروف تھے۔
واضح رہے کہ غزہ میں 11 اکتوبر 2025 کو جنگ بندی کا اعلان کیا گیا تھا مگر اس کے باوجود وہاں حملے جاری ہیں جس سے اب تک 906 فلسطینی شہید ہوچکے ہیں جبکہ 7 اکتوبر 2023 کے بعد سے اسرائیلی حملوں میں 72 ہزار سے زائد فلسطینی شہید ہوچکے ہیں۔
Leave a Reply