انگور ایک مزیدار پھل ہے جو مختلف رنگوں میں دستیاب ہوتا ہے۔
اس رسیلے اور میٹھے پھل میں متعدد غذائی اجزا اور اینٹی آکسائیڈنٹس موجود ہوتے ہیں جبکہ کیلوریز کی مقدار بہت کم ہوتی ہے۔
ایسا مانا جاتا ہے کہ انسان ہزاروں سال سے انگور کھا رہے ہیں اور اس پھل کی کچھ اقسام میں بیج ہوتے ہیں جبکہ کچھ اقسام بیجوں کے بغیر ہوتی ہیں۔
اب طبی ماہرین نے روزانہ کچھ مقدار میں انگور کھانے کا بہترین فائدہ دریافت کیا ہے۔
امریکا کی ویسٹرن نیو انگلینڈ یونیورسٹی کی تحقیق میں دریافت کیا گیا کہ انگور کھانے سے جِلد میں ایسی جینیاتی تبدیلیاں آتی ہیں جس سے جِلد کو سورج کی روشنی میں موجود الٹرا وائلٹ شعاعوں سے تحفظ ملتا ہے۔
تحقیق کے مطابق 2 ہفتوں تک کچھ مقدار میں انگور کھانے سے جِلد میں موجود جینز میں تبدیلیاں آتی ہیں۔
اس تحقیق میں شامل رضا کاروں کو 2 ہفتوں تک روزانہ کچھ مقدار میں انگوروں کا استعمال کرایا گیا۔
انگوروں کے استعمال سے قبل اور اس کے بعد رضا کاروں کی جِلد کی صحت کا تجزیہ کیا گیا اور دیکھا گیا کہ الٹرا وائلٹ شعاعوں سے جِلد پر کیا اثرات مرتب ہوتے ہیں۔
محققین نے دریافت کیا کہ 2 ہفتوں تک انگور کھانے والے افراد کے جینز میں نمایاں فرق آیا۔
ان افراد کی جِلد کی جینیاتی سرگرمیوں میں ایک منفرد اثر دیکھنے میں آیا۔
تحقیق کے مطابق اس اثر کے باعث الٹرا وائلٹ شعاعوں میں جِلد کے جینز میں ایسا عمل متحرک ہوتا ہے جو جِلد کو سورج کی روشنی سے ہونے والے نقصان سے تحفظ فراہم کرتا ہے۔
محققین نے الٹرا وائلٹ شعاعوں کی معمولی مقدار کا جِلد پر تجربہ کیا اور دیکھا کہ انگور کھانے سے تکسیدی تناؤ پر کیا اثرات مرتب ہوتے ہیں۔
نتائج سے معلوم ہوا کہ ان افراد میں تکسیدی تناؤ کی سطح کم ہوتی ہے۔
محققین کے مطابق ہم یہ کہہ سکتے ہیں کہ یہ پھل کسی سپر فوڈ کی طرح کام کرکے انسانی جِلد کو نمایاں تحفظ فراہم کرتا ہے۔
انہوں نے بتایا کہ ہم نے جِلد کے سب سے بڑے عضو یعنی جِلد کا جائزہ لیا اور دریافت ہوا کہ اس پھل سے جِلد کی صحت بہتر ہوتی ہے۔
انہوں نے مزید بتایا کہ جِلد سے ہٹ کر یہ بھی واضح ہے کہ انگور کھانے سے دیگر اعضا جیسے جگر، مسلز، گردوں اور دماغ میں موجود جینز پر بھی مثبت اثرات مرتب ہوتے ہیں۔
اس تحقیق کے نتائج جرنل اے سی ایس نیوٹریشن سائنس میں شائع ہوئے۔
Leave a Reply