بچوں کو سوشل میڈیا کے محدود استعمال کی اجازت سے متعلق گفتگو پر شوبز، سیاست اور ٹیکنالوجی کی اہم شخصیات متفق نظر آتی ہیں۔
بچوں کے لیے سوشل میڈیا کے استعمال کو محدود کرنے سے متعلق جہاں دنیا کے مختلف ممالک میں بحث مباحثہ جاری ہے اور کچھ ممالک اس حوالے سے قانون سازی بھی کررہے ہیں وہیں ان معاملات پر شوبز، سیاست اور ٹیکنالوجی کی اہم شخصیات بھی متفق نظر آتی ہیں۔
اس حوالے سے دیکھا جائے تو سابق امریکی صدر باراک اوباما نے بیٹیوں کو فیس بک سے دور رکھا جب کہ برطانوی شاہی خاندان بچوں کے اسکرین ٹائم پر سخت پابندی کے حامی ہیں۔
ٹیکنالوجی کے بڑے نام بل گیٹس، اسٹیو جابز اور مارک زکربرگ بھی بچوں کے آزادانہ اسکرین ٹائم کے خلاف ہیں جب کہ یوٹیوب و گوگل قیادت نیل موہن، سوسن ووجیککی اور سندر پچائی بھی بچوں کی ڈیجیٹل رسائی محدود کرنے اور14 سال سے پہلے اسمارٹ فون نا دینے کے حق میں ہیں۔
جارج کلونی، کیرا نائٹلی اور شکیرا سمیت دیگر کئی عالمی ستارے اور فلم اسٹار بھی بچوں کو سوشل میڈیا سے دور رکھنے یا رسائی محدود کرنے کی پالیسی کے حق میں ہیں۔
ڈیجیٹل دور میں جہاں سوشل میڈیا بچوں کی زندگی کا لازمی حصہ بنتا جا رہا ہے وہیں دنیا کی معروف شوبز شخصیات، حکمران رہنما اور ارب پتی کاروباری افراد ایک مختلف راستہ اختیار کرتے دکھائی دیتے ہیں۔
Leave a Reply