چینی صدر شی جن پنگ نے اپنے دورہ شمالی کوریا کے دوران شمالی کوریا اور اس کے رہنما کم جونگ اُن کے ساتھ بیجنگ کی حمایت کو ’غیر متزلزل‘ قرار دیا ہے۔
چینی میڈیا کے مطابق 2019 کے بعد شمالی کوریا کے اپنے پہلے دورے کے موقع پر شی جن پنگ اور ان کی اہلیہ پینگ لی یوان کا پیانگ یانگ انٹرنیشنل ائیرپورٹ پر کم جونگ اُن اور ان کی اہلیہ ری سول جو نے استقبال کیا۔
چینی صدر نے پیر کو شمالی کوریا کے دو روزہ دورے کے آغاز پر کم جونگ اُن سے ملاقات کے دوران کہا کہ چین کی کمیونسٹ پارٹی اور اس کی حکومت کا چین اور شمالی کوریا کے درمیان روایتی دوستی کو اہمیت دینے کا مؤقف تبدیل نہیں ہوگا۔
چینی سرکاری خبر ایجنسی شنہوا کے مطابق شی جن پنگ نے دونوں ممالک کے درمیان خارجہ پالیسی، قانون نافذ کرنے والے اداروں اور دفاعی شعبوں سمیت مختلف شعبوں میں ہر سطح پر تبادلوں اور تعاون کو مزید مضبوط بنانے پر زور دیا۔
یہ دورہ رواں سال شی جن پنگ کا پہلا غیر ملکی دورہ ہے اور یہ ایسے وقت میں ہو رہا ہے جب وہ بیجنگ میں امریکی صدر ڈونلڈ ٹرمپ اور روسی صدر ولادیمیر پیوٹن سے حالیہ ملاقاتیں کر چکے ہیں۔
Leave a Reply