دنیا کے امیر ترین شخص ایلون مسک بہت جلد دنیا کے پہلے ٹریلین ائیر یا کھرب پتی بننے کے قریب ہیں۔
درحقیقت انہوں نے 11 جون 2026 کو ایک دن میں سب سے زیادہ دولت کمانے کا نیا ریکارڈ قائم کیا ہے۔
ایلون مسک کی کمپنی اسپیس ایکس 12 جون کو اپنے حصص عوام کو فروخت کرنے کے لیے پیش کر رہی ہے اور اس کے لیے 75 ارب ڈالرز کا سرمایہ کمپنی نے اکٹھا کیا ہے۔
اس کے نتیجے میں 11 جون کو ایلون مسک کی دولت میں ایک دن میں ریکارڈ 274 ارب ڈالرز کا اضافہ ہوا اور اب وہ 971 ارب ڈالرز کے مالک بن چکے ہیں۔
ٹریلین ائیر یا ایک ہزار ارب ڈالرز کے مالک بننے کے لیے ایلون مسک کو مزید 29 ارب ڈالرز درکار ہیں جو ممکنہ طور پر اسپیس ایکس کے حصص کی فروخت سے حاصل ہو جائیں گے۔
اسپیس ایکس کے حصص کی فروخت 1750 ارب ڈالرز مارکیٹ ویلیو کے ساتھ متوقع ہے۔
واضح رہے کہ ایلون مسک اسپیس ایکس کے 42 فیصد حصص کے مالک ہیں اور رواں سال کے دوران ان کی دولت میں 351 ارب ڈالرز کا اضافہ ہوچکا ہے۔
اسپیس ایکس وہ کمپنی ہے جس نے کامیابی سے دنیا کے پہلے بار بار استعمال کیے جانے کے قابل راکٹ کو تیار کیا اور اسٹار لنک کے نام سے بڑے سیٹلائیٹ نیٹ ورک کو تشکیل دیا۔
دوسری جانب آکسفم کی ایک تحقیق میں بتایا گیا کہ 2025 کے دوران ہر منٹ ایلون مسک کی دولت میں کتنا اضافہ ہوا۔
تحقیق کے مطابق ایلون مسک دنیا کی 46 فیصد غریب آبادی کی مجموعی دولت سے زیادہ کے مالک ہیں۔
تحقیق میں مزید بتایا گیا کہ 2025 میں ہر منٹ ایلون مسک کی دولت میں 10 لاکھ ڈالرز سے زائد کا اضافہ ہوا جبکہ مجموعی طور پر ان کی دولت میں ایک سال کے دوران 550 ارب ڈالرز سے زائد کا اضافہ ہوا۔
تحقیق میں بتایا گیا کہ ایک ہزار ڈالرز کے مالک ایلون مسک اگر روزانہ 10 لاکھ ڈالرز خرچ کریں اور ان کی دولت میں مزید اضافہ نہ ہو تو انہیں ایک ہزار ڈالرز ختم کرنے کے لیے 2740 سال درکار ہوں گے۔
اسی طرح اگر ایلون مسک دنیا کے ہر فرد کو 100 ڈالرز دیں تب بھی وہ دنیا کے 10 امیر ترین افراد میں شامل ہوں گے اور ان کے پاس 184 ارب ڈالرز سے زائد بچ جائیں گے۔
Leave a Reply