شمالی کوریا کے رہنما کم جونگ اُن نے ہفتے کے روز ایک اسلحہ ساز فیکٹری کے دورے کے دوران میزائلوں کی پیداوار بڑھانے کی ہدایت کردی۔
سرکاری میڈیا کے مطابق ایک میزائل فیکٹری کے دورے کے دوران کم جونگ اُن نے کوریائی فوج کی بدلتی ہوئی آپریشنل ضروریات کے مطابق پیداوار بڑھانے کی ضرورت پر زور دیا۔
سرکاری میڈیا کی جانب سے جاری تصاویر میں کم جونگ اُن کو درجنوں ایسے میزائلوں کا معائنہ کرتے دکھایا گیا ہے جو ہواسونگ-11 شارٹ رینج بیلسٹک میزائل (ایس آر بی ایم) معلوم ہوتے ہیں۔
یہ ہتھیار شمالی کوریا کی دفاعی حکمت عملی میں اہم کردار اختیار کر چکے ہیں جبکہ کم جونگ اُن اس سے قبل دعویٰ کر چکے ہیں کہ ان میزائلوں کو جوہری وارہیڈز سے لیس کیا جاسکتا ہے اور یہ جنوبی کوریا اور خطے میں موجود امریکی اڈوں کو نشانہ بنانے کی صلاحیت رکھتے ہیں۔
رپورٹ کے مطابق شمالی کوریا نے حالیہ مہینوں میں ہواسونگ-11 میزائل سیریز کی صلاحیتوں کو مزید متنوع بنانے کی کوشش کی ہے، جن میں کلسٹر گولہ بارود، بلیک آؤٹ بم اور فریگمنٹیشن وارہیڈز سے لیس مختلف اقسام کا تجربہ شامل ہے۔
مقامی میڈیا کے مطابق یہ میزائل سیریز شمالی کوریا کی جانب سے ہتھیاروں کی فروخت کے ذریعے غیر ملکی زرِ مبادلہ حاصل کرنے کی کوششوں میں بھی مرکزی کردار ادا کر رہی ہے اور روس کو فراہم کیے گئے ہواسونگ-11 اے (کے این-23) اور ہواسونگ-11 بی (کے این-24) میزائل یوکرین میں اہداف کو نشانہ بنانے کے لیے استعمال کیے جا رہے ہیں۔
Leave a Reply