جارجیا میلونی نے عمران خان یا وزیراعظم شہباز شریف کے حوالے سے کوئی بیانات نہیں دیے

آن لائن گردش کرنے والے ایک دعوے میں الزام لگایا گیا ہے کہ اٹلی کی وزیر اعظم جارجیا میلونی نے حال ہی میں میڈیا سے گفتگو کے دوران پاکستان کے وزیر اعظم شہباز شریف کی تعریف کی اور یہ مشورہ دیا کہ اگر وہ ایک دہائی قبل یہ عہدہ سنبھال لیتے تو پاکستان ایک سپر پاور بن سکتا تھا۔

یہ دعویٰ غلط ہے۔ ایسا کوئی بیان نہیں دیا گیا۔

19 اپریل کو ایکس (سابقہ ٹوئٹر) پر ایک اکاؤنٹ سے ایک مختصر ویڈیو شیئر کی گئی جس میں اطالوی وزیر اعظم جارجیا میلونی کو نامہ نگاروں سے گفتگو کرتے ہوئے دیکھا جا سکتا ہے۔ ویڈیو کے کیپشن میں کہا گیا: ”میں نہیں جانتی عمران خان کون ہے؟ لیکن اتنا کہوں گی شہباز شریف جیسے قابل آدمی کو اگر دس سال پہلے وزیراعظم بنایا ہوتا تو یقیناً پاکستان اب تک سپر پاور ہوتا۔“

صارف نے دعویٰ کیا کہ جارجیا میلونی نے یہ بیان دیا تھا۔

اس آرٹیکل کے شائع کیے جانے کے وقت تک پوسٹ کو1 لاکھ 28 ہزار دفعہ دیکھا، 3 ہزار 100 بار لائک اور878 مرتبہ ری پوسٹ کیا گیا۔

اسی طرح کے دعوے ایکس (سابقہ ٹوئٹر)، فیس بک اور انسٹاگرام پر دیگر مقامات بشمول یہاں، یہاں اور یہاں بھی شیئر کیے گئے ہیں۔

حقیقت

وائرل ویڈیو میں اطالوی وزیر اعظم نے سابق پاکستانی وزیر اعظم عمران خان یا موجودہ وزیر اعظم شہباز شریف کے بارے میں کوئی بیانات نہیں دیے۔

جیو فیکٹ چیک نے ریورس امیج سرچ (reverse image search) کے ذریعے اس کلپ کا سراغ لگایا، جو کہ 14 اپریل 2026 کو اٹلی کے شہر ویرونا (Verona) میں ایک (fair) میلے کے دورے کے دوران جارجیا میلونی کی میڈیا سے گفتگو کا ہے۔

اطالوی زبان میں موجود اصل آڈیو کے ترجمے سے پتہ چلتا ہے کہ وہ ایک صحافی کی جانب سے امریکی صدر ڈونلڈ ٹرمپ کے بارے میں پوچھے گئے سوال کا جواب دے رہی تھیں۔ ان کے بیانات ڈونلڈ ٹرمپ کی جانب سے پوپ لیو (Pope Leo XIV) پر کی گئی اس تنقید سے متعلق تھے، جس میں ٹرمپ نے 12 اپریل کو ٹروتھ سوشل (Truth Social) پر اپنی ایک پوسٹ میں پوپ کو ”کمزور“ قرار دیا تھا۔

مکمل ویڈیو کا ایک ورژن، انگریزی کیپشنز(captions) کے ساتھ، یہاں دیکھا جا سکتا ہے۔

اسی میڈیا گفتگو کا ایک اور حصہ جرمن ادارے ڈی ڈبلیو (DW) نے بھی رپورٹ کیا تھا۔

جیو فیکٹ چیک کو ایسی کوئی معتبر خبریں یا رپورٹس نہیں ملیں جن میں جارجیا میلونی سے پاکستانی سیاست کے بارے میں کوئی بھی بیان منسوب کیا گیا ہو۔

فیصلہ: وائرل ویڈیو میں جارجیا میلونی کے بیانات کو غلط رنگ دے کر پیش کیا گیا ہے۔ ان کی گفتگو ڈونلڈ ٹرمپ کی جانب سے پوپ پر کی جانے والی تنقید کے بارے میں تھی اور اس میں عمران خان یا شہباز شریف کا کوئی حوالہ موجود نہیں تھا۔

ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔

Source link