گوگل کا سالانہ ڈویلپر کانفرنس کے موقع پر متعدد نئے اے آئی ٹولز متعارف کرانے کا اعلان

گوگل نے اپنی سالانہ آئی او ڈویلپر کانفرنس کے مقع پر متعدد اعلانات کیے ہیں۔

19 مئی کو اس کانفرنس کا آغاز ہوا جس کے دوران کمپنی کی جانب سے متعدد نئے جیمنائی ٹولز اور اسمارٹ گلاسز سمیت دیگر اعلانات کیے گئے۔

کمپنی کے مطابق اس کا اصل مقصد آرٹی فیشل انٹیلی جنس (اے آئی) کو ہر ایک کے لیے کارآمد بنانا ہے۔

اس کے لیے گوگل کی جانب سے متعدد شعبوں پر کام کیا گیا ہے اور اس حوالے سے صارفین کے لیے جو اعلانات کیے گئے، وہ درج ذیل ہیں۔

جیمنائی اومنی (ماڈل)

جیمنائی اومنی گوگل کا نیا ماڈل ہے جو صارف کے ان پٹ پر کسی بھی چیز کو میڈیا فائل میں آسانی سے تبدیل کرسکتا ہے۔

مثال کے طور پر ٹیکسٹ، فوٹوز اور ویڈیو کلپس کے امتزاج سے یہ ماڈل ہائی کوالٹی ویڈیو آؤٹ پٹ تیار کرسکتا ہے۔

کمپنی نے بتایا کہ جیمنائی اومنی فلیش کو سب سے پہلے جیمنائی ایپ، فلو اور یوٹیوب کا حصہ بنایا جائے گا۔

جیمنائی 3.5 فلیش (ماڈل)

گوگل کے مطابق یہ اب تک مضبوط ترین ایجنٹک اور کوڈنگ ماڈل ہے جو بہت زیادہ تیز رفتاری سے کام کرتا ہے۔

درحقیقت کمپنی کا دعویٰ ہے کہ اس سے قبل جس کام کو کرنے میں چند دن یا ہفتے لگتے تھے، جیمنائی 3.5 فلیش اسے بہت کم وقت میں کرلیتا ہے جبکہ لاگت کے لحاظ سے بھی یہ بہت سستا اے آئی ماڈل ہے۔

نیا اے آئی سرچ باکس (گوگل سرچ انجن)

کمپنی نے گوگل سرچ باکس کو گزشتہ 25 سال کی سب سے بڑی اپ ڈیٹ قرار دیا ہے، جو مکمل طور پر اے آئی سے جڑا ہے۔

اس سے صارفین ٹیکسٹ، امیجز، فائلز، ویڈیوز یا کروم ٹیب کے ذریعے سرچ کرکے وہ سب کچھ جان سکیں گے جو آپ کے ذہن میں ہوگا۔

انٹیلی جنٹ آئی وئیر

انٹیلی جنٹ آئی وئیر گوگل کے نئے اے آئی اسمارٹ گلاسز ہیں۔

سب سے پہلے آڈیو گلاسز کو رواں سال کی دوسری ششماہی میں متعارف کرایا جائے گا جو اینڈرائیڈ ایکس آر پر مبنی ہوں گے۔

ان گلاسز کو اس لیے ڈیزائن کیا گیا ہے تاکہ جیمنائی آپ کے کان میں خاموشی سے بات کرسکے جبکہ مختلف چیزیں جیسے موسیقی سننے، تصاویر لینے، کالز کرنے یا فون کو چھوئے بغیر فون ایپس کو استعمال کرنے میں مدد فراہم کرسکے۔