گوگل کی جانب سے آرٹی فیشل انٹیلی جنس (اے آئی) سرچ کو متعدد پراڈکٹس کا حصہ بنایا جا رہا ہے۔
اب یوٹیوب میں بھی اے آئی سرچ کا فیچر متعارف کرایا جا رہا ہے۔
آسک یوٹیوب نامی اس فیچر میں صارفین سادہ سرچ کی بجائے پیچیدہ سوالات پوچھ کر جامع رزلٹس حاصل کرسکیں گے جن میں ویڈیوز اور ٹیکسٹ وغیرہ شامل ہوں گے جبکہ فالو اپ سوالات بھی پوچھ سکیں گے۔
درحقیقت اس سرچ فیچر سے آپ کسی ویڈیو کے اس حصے پر بھی جاسکتے ہیں جو آپ کی ضرورت کے مطابق ہوگا، تاکہ آپ کو پوری ویڈیو دیکھنے کی ضرورت نہ ہو۔
گوگل کی سالانہ ڈویلپر کانفرنس کے موقع پر کمپنی کے چیف ایگزیکٹو سندر پچائی نے بتایا کہ آسک یوٹیوب سے انفارمیشن کا حصول بہت آسان ہو جائے گا۔
یہ نیا فیچر ابھی امریکا میں یوٹیوب پریمیئم کے 18 سال یا اس سے زائد عمر کے افراد کے لیے متعارف کرایا گیا ہے۔
گوگل کے مطابق یہ فیچر دیگر خطوں میں جلد متعارف کرایا جائے گا۔
کمپنی کی جانب سے سرچ انجن اور اے آئی اوور ویوز میں سمریز کے ساتھ متعلقہ ویڈیوز کی فہرست بھی متعارف کرائی جاتی ہے۔
مگر آسک یوٹیوب میں ویڈیوز کو خصوصی اہمیت دی گئی ہے اور کسی ویڈیو کے مخصوص لمحے تک رسائی اس فیچر کا سب سے بہتر حصہ ہے۔
یہ فیچر آپ کو اکاؤنٹ میں جاکر خود ان ایبل کرنا ہوگا اور اس کے بعد سرچ بار میں آسک یوٹیوب نامی نئے بٹن پر کلک کرنے پر مختلف پروموٹس سجیشنز نظر آئیں گی یا آپ خود بھی پروموٹ تحریر کرسکتے ہیں۔
مثال کے طور پر آپ کسی جگہ کے روڈ ٹرپ کے بارے میں پوچھ سکتے ہیں۔
اس کے نتائج کے بعد آپ اس سے متعلق مزید سوالات پوچھ سکتے ہیں جبکہ کمپنی کی جانب سے سمری کے ساتھ ویڈیوز کی لسٹ بھی فراہم کی جاتی ہے۔
Leave a Reply