کراچی کی سیشن عدالت نے ڈونلڈ ٹرمپ، نیتن یاہو، نریندرا مودی اور ہیبت اللہ اخوندزادہ کے خلاف مقدمے کی درخواست ناقابل سماعت قرار دے کر مسترد کر دی۔
ایڈیشنل ڈسٹرکٹ اینڈ سیشن جج غربی کی عدالت میں امریکی صدر ڈونلڈ ٹرمپ، اسرائیلی وزیر اعظم نیتن یاہو ، بھارتی وزیر اعظم نریندرا مودی اور اخونزدہ ہیبت اللہ کے خلاف مقدمے کی درخواست ہوئی۔
عدالت نے پولیس رپورٹ اور درخواست گزار وکیل کے دلائل کے بعد فیصلہ سنا دیا۔عدالت نے درخواست ناقابل سماعت قرار دے کر مسترد کر دی۔
وکیل درخواست گزار نے مؤقف اپنایا کہ ہماری درخواست ہے کہ مقدمہ درج کروایا جائے دوبار تھانے گئے ہماری درخواست کو وصول نہیں کیاگیا۔
جس پر عدالت نے کہا کہ جن کیخلاف آپ کی درخواست ہے کیا وہ پاکستانی اور پاکستان میں موجود ہیں ؟
وکیل درخواست گزار نے کہا کہ اگر پڑوس میں کوئی دہشت گردی ہو تو اس کے خلاف قانونی کارروائی ہوسکتی ہے۔ پی پی سی کی سیکشن 125 کے تحت یہ سزا کے لائق جرم ہے۔
جس پر عدالت نے سوال کیا کہ مطمئن کریں پاکستان پینل کوڈ کس طرح کسی دوسرے ملک کے شہری پر لاگو ہوسکتی ہے، آپ کی درخواست قابل سماعت نہیں ہے آپ بین الاقومی عدالت انصاف میں جائیں وہاں ایسی استدعا کریں۔
جس پر وکیل درخواست گزار نے کہا کہ بین الاقوامی عدالت انصاف میں صرف حکومت جاسکتی ہے اس جنگ سے پاکستان کے لاکھوں لوگ پریشان ہیں۔
پولیس کا موقف تھا کہ وکلا غیر ملکی سربراہوں کیخلاف مقدمہ درج کرانا چاہتے ہیں ایسا کوئی ثبوت نہیں غیر ملکی سربراہوں نے ہمارے علاقے میں دہشت گردی کی ہو اس درخواست پر مقدمہ درج نہیں کیا جا سکتا۔
Leave a Reply