ایلون مسک برسوں سے انسانوں کو مریخ پر پہنچانے کا خواب دیکھ رہے ہیں۔
اس کا اظہار وہ ماضی میں متعدد بار کر چکے ہیں مگر اب اچانک ہی انہوں نے مریخ کی جگہ چاند کو دینے کا فیصلہ کیا ہے۔
واضح رہے کہ امریکی خلائی ادارے ناسا کی جانب سے 5 دہائیوں سے زائد عرصے بعد مارچ 2026 میں انسان بردار آرٹیمس 2 مشن چاند کے مدار پر بھیجا جائے گا۔
آرٹیمس 2 کے بعد آرٹیمس 3 مشن کو 2 برسوں میں چاند پر بھیجا جائے گا اور اس میں سوار خلا باز چاند کی سطح پر قدم رکھیں گے۔
متعدد دیگر کمپنیوں کی جانب سے بھی چاند کے مدار میں خلائی اسٹیشنز یا چاند کی سطح پر مستقل بیسز بنانے کے منصوبے بنائے جا رہے ہیں۔
اس موقع پر ایلون مسک نے ایک ایکس (ٹوئٹر) پوسٹ میں مریخ کی جگہ چاند پر توجہ مرکوز کرنے کا اعلان کیا۔
انہوں نے پوسٹ میں کہا کہ جو افراد ابھی بھی آگاہ نہیں، جان لیں کہ اسپیس ایکس نے چاند پر انسانی شہر بسانے پر توجہ مرکوز کرنا شروع کر دی ہے۔
انہوں نے کہا کہ ہم ایسا ایک دہائی سے کم عرصے میں کرلیں گے جبکہ مریخ پر ایسا شہر بسانے کے لیے ہمیں 20 سال یا اس سے زائد عرصہ درکار ہوگا۔
ان کا کہنا تھا کہ مریخ کا سفر ہر 26 مہینے بعد ہی ممکن ہوتا ہے جب دونوں سیارے ایک لائن میں ہوتے ہیں، جبکہ چاند کے لیے ہم ہر 10 دن مین مشن لانچ کرسکتے ہیں، تو اس کا مطلب یہ ہے کہ چاند پر شہر کو بسانا مریخ کے مقابلے میں زیادہ تیزی سے ممکن ہے۔
ایلون مسک نے کہا کہ اسپیس ایکس کی جانب سے مریخ پر شہر کی تعمیر کا منصوبہ ہمیشہ برقرار رہے گا اور اس پر 5 سے 7 برسوں بعد کام شروع کیا جائے گا، مگر چاند پر یہ کام زیادہ تیزی سے مکمل ہوسکتا ہے۔
Leave a Reply