[ad_1]
وزیر مملکت برائے داخلہ طلال چوہدری کا کہنا ہےکہ بھارتی وزیرخارجہ کا مصافحہ اللہ کرے اخلاص والا ہو، منافقت والا نہ ہو، شہباز شریف اور سی ڈی ایف کی پارٹنر شپ رزلٹ دے رہی ہے، اسی پارٹنرشپ نے بھارت سے جنگ جیتی اور معیشت بہترکی، مجھے دور دور تک ایسا کوئی بولر نہیں لگتا جو اس جوڑی کی وکٹ لے سکے۔
ایک انٹرویو میں وزیر مملکت برائے داخلہ طلال چوہدری کا کہنا تھا کہ اسی پارٹنرشپ نے سفارت کاری کو عروج پر پہنچایا ہے، اللہ کرے یہ جوڑی اسی طرح وکٹ پرکھڑی رہے اورپاکستان کے لیے رنزبنتے رہیں۔
طلال چوہدری کا کہنا تھا کہ پاکستان کے مسائل حل کرنے کے لیے حکومت کی یا وزیراعظم کی کوئی انا نہیں، ہماری انا سے پاکستان کے مسائل اور پاکستان کا مفاد بڑا ہے، جب بھارت نے حملہ کیا تو ہم نے کوشش کی کہ سب کو آن بورڈکیا جائے۔
وزیر مملکت برائے داخلہ کا کہنا تھا کہ بھارتی وزیرخارجہ کا مصافحہ اللہ کرے اخلاص والا ہو، منافقت والا نہ ہو، اس سے پہلے بھارت نے جتنے بھی مصافحےکیے ہیں وہ سب منافقت والے تھے، یہ وہی بھارت ہے جو کھیلوں کے میدان میں بھی ہم سے ہاتھ نہیں ملاتا تھا، بھارت دنیا کو کہتا تھا کہ ہم ان کے ساتھ اس لیے نہیں بیٹھتےکہ یہ ہمارے ہم پلہ نہیں، مئی کی جنگ نے دنیا میں ہر چیز بدل دی ہے۔
ان کا کہنا تھا کہ اس وقت الحمدللہ پوری دنیا میں پاکستان کا بھارت سے زیادہ وزن ہے، بھارت بین الاقوامی طورپرنہ صرف جنگ ہارا بلکہ اس کے بیانیے کو بھی شکست ہوئی، پہلگام کی بات کریں پلوامہ کی بات کریں یہ سب بی جے پی کی سازش تھی۔
انہوں نے کہا کہ مشیراطلاعات کے پی اور عظمیٰ بخاری کے درمیان جوزبان استعمال ہوئی وہ نہیں ہونی چاہیے تھی، جو خیبرپختونخوا کے وزیر نے باتیں کی ہیں اس کے بعد ہمارے پاس کیا آپشن بچتا ہے، عظمیٰ بخاری خاتون ہونے کے باوجود اس کو جواب دے رہی ہیں، ایسے لوگوں کو جواب نہ دیا جائے تویہ سمجھتے ہیں کہ ان کی یہ غنڈا گردی چل گئی ہے۔
طلال چوہدری کا کہنا تھا کہ افسوس کے ساتھ یہ کہنا پڑتا ہےکہ بانی پی ٹی آئی کا مشن کچھ اور ہے، بانی پی ٹی آئی ایسی میزپرنہیں بیٹھنا چاہتے جس پرپاکستان کے مسائل کی بات ہو، بانی پی ٹی آئی جو چاہتے ہیں وہ کبھی نہیں ہوگا، بانی پی ٹی آئی کے ذہن میں بنگلادیش، نیپال ہے، پاکستان میں ایسا کچھ نہیں ہوگا، ہم مسائل پر پی ٹی آئی سے ہمیشہ بات چیت کرنے کو تیارہیں، بات چیت کوئی مخصوص شخصیت یا مخصوص کیسز سے متعلق نہیں ہوگی۔
ایک سوال کے جواب میں ان کا کہنا تھا کہ نوازشریف کہیں گم نہیں ہیں، آپ کو ہماری شکلوں میں کیا نظر آتا ہے؟ ہم سب نوازشریف ہیں،اس وقت نواز شریف کی ہی حکومت ہے، اس وقت تمام گائیڈ لائن نوازشریف کی ہے اور ہماری توجہ صرف کام پر ہے۔
[ad_2]
Source link
Leave a Reply