اسلام آباد: وزیراعظم شہباز شریف سے وفاقی وزیر خالد مقبول صدیقی کی قیادت میں ایم کیو ایم کے وفد نے ملاقات کی جس میں وفد نے وزیراعظم کو آئندہ وفاقی بجٹ پر ایم کیو ایم کی طرف سے تجاویز پیش کیں۔
وزیر اعظم آفس کے اعلامیے کے مطابق وفاقی وزیر خالد مقبول صدیقی کی قیادت میں ایم کیو ایم کے وفد نے بدھ کے روز وزیراعظم شہباز شریف سے ملاقات کی۔
ایم کیو ایم کے وفد میں ڈاکٹر فاروق ستار، امین الحق اور جاوید حنیف شامل تھے جبکہ حکومت کی طرف سے نائب وزیرِ اعظم اسحاق ڈار اور مشیر وزیرِ اعظم رانا ثناء اللہ بھی موجود تھے۔
وفد نے وزیرِ اعظم کو آئندہ وفاقی بجٹ پر ایم کیو ایم کی طرف سے تجاویز پیش کیں۔
اعلامیے کے مطابق ملاقات میں وفاقی حکومت کے تحت کراچی میں عوامی فلاحی منصوبوں پر بھی تفصیلی گفتگو کی گئی۔
اس موقع پر وزیر اعظم نےکہا کہ ایم کیو ایم وفاقی حکومت کی اہم اتحادی جماعت ہے، ایم کیو ایم نے حکومت کا عوامی فلاح کے حوالے سے ہر اقدام میں ساتھ دیا۔
اعلامیے کے مطابق وزیرِ اعظم نے متعلقہ حکام کو ایم کیو ایم کی بجٹ تجاویز پر غور اور جامع لائحہ عمل مرتب کرکے پیش کرنے کی ہدایت کی۔
اس کے علاوہ ملاقات میں ملکی سیاسی صورتحال پر بھی بات چیت کی گئی۔
Leave a Reply