امریکی صدر ڈونلڈ ٹرمپ نے کہا ہے کہ ہم ایران کے جواب کا چند دن تک انتظار کریں گے جب تک ایران سے کوئی معاہدہ نہیں ہو جاتا، ایران کو کوئی ریلیف فراہم نہیں کیا جائے گا۔
میڈیا سے بات چیت کرتے ہوئے امریکی صدر ٹرمپ نے کہا کہ ہمیں درست جواب حاصل کرنا ہوگا، امریکا کا جن ایرانی رہنماؤں سے رابطہ ہے وہ معقول لوگ ہیں۔
امریکی صدر ڈونلڈ ٹرمپ نے ایک بار پھر دعویٰ کیاکہ ایران ڈیل کرنےکےلیے بےتاب ہے، انہوں نے ساتھ دھمکی بھی دی کہ اگر ایران کے ساتھ ڈیل نہیں ہوئی تو امریکا دوبارہ حملہ کرسکتا ہے۔
صدر ڈونلڈ ٹرمپ نے صحافیوں سے گفتگو کرتے ہوئے کہا کہ ایران میں لوگوں کی حالت انتہائی خراب ہے، وہ ڈیل چاہتاہے، ایران کےاندر بدترین معاشی صورتحال کےباعث شدید عوامی غم اور غصہ ہے، ایران جنگ کو ابھی تین ہی ماہ ہوئےہیں، اس میں بھی زیادہ وقت سیز فائر کا ہے، آبنائے ہرمز کو بھی کھول دیں گے لیکن مجھے کوئی جلدی نہیں۔
ٹرمپ نے دعویٰ کیا کہ ایران بدترین شکست سے دوچار ہے، ایران کو بری طرح تباہ کردیا، آئندہ دنوں میں مزید چیزیں دیکھیں گے، ایران کے ساتھ معاہدے پر جلدی نہیں۔
اس کے علاوہ ٹرمپ نے ترک صدر رجب طیب اردوان سے فون پر بات چیت سے بھی آگاہ کیا اور کہا کہ ان کی ترک صدر سے فون پر اچھی گفتگو ہوئی ہے۔
کیوبا کا ذکر کرتے ہوئے ٹرمپ نے کہا کہ کیوبا کی حالت بہت خراب ہے۔ ہمیں کیوبا کے عوام کی مدد کرنی ہو گی۔
واضح رہے کہ ایرانی وزارت خارجہ کے ترجمان اسماعیل بقائی نے تصدیق کرتے ہوئے کہا ہے کہ امریکا کی جانب سے نئی تجاویز موصول ہوئی ہیں ، ایران نئی امریکی تجاویز کا جائزہ لے رہا ہے۔
اسماعیل بقائی نے اپنے بیان میں کہا ہے کہ پاکستان کے وزیر داخلہ محسن نقوی ایران اور امریکا کے درمیان پیغامات کے تبادلے میں سہولت فراہم کرنے کے لیے ایران میں موجود ہیں ، ایران کے 14 نکات کی بنیاد پر امریکا سے پیغامات کا تبادلہ جاری ہے۔
Leave a Reply