ایلون مسک ٹیسلا، اسپیس ایکس اور دیگر متعدد کمپنیوں کے مالک ہیں اور دنیا کے امیر ترین شخص ہیں۔
تو ایلون مسک کے خیال میں وہ کیا چیز ہے جو دولت سے نہیں خریدی جاسکتی؟
اس کا جواب انہوں نے گزشتہ دنوں ایک ایکس (ٹوئٹر) پوسٹ میں دیا۔
انہوں نے ایکس پوسٹ میں لکھا کہ کہا جاتا ہے کہ دولت سے خوشی نہیں خریدی جاسکتی اور یہ بات واقعی درست ہے۔
انہوں نے پوسٹ میں لکھا تھا کہ ‘جس کسی نے بھی کہا کہ دولت سے خوشی نہیں خریدی جاسکتی، واقعی واقف تھا کہ وہ کیا کہہ رہا ہے’۔
ان کی یہ پوسٹ بہت تیزی سے وائرل ہوئی اور لوگوں کی جانب سے مزاح، میمز اور دیگر انداز سے اس پر ردعمل ظاہر کیا گیا۔
صارفین کا کہنا تھا کہ دولت خوشی کی ضمانت تو شاید نہ ہو مگر اس کی کمی ضرور روح کو متاثر کرسکتی ہے۔
کچھ افراد نے مزاح کو استعمال کرتے ہوئے کہا کہ ہمیں 10 لاکھ ڈالرز بھیج دیں تاکہ ہم آپ کی بات کو سمجھ سکیں۔
ایک صارف نے کہا کہ ‘فلسفی بننا اس وقت آسان ہوتا ہے جب آپ کرایہ ادا کر دیتے ہیں’۔
کچھ کا کہنا تھا کہ خوشی دولت سے بڑھ کر ہوتی ہے، کسی کی مدد کرنے سے بھی خوشی ہوتی ہے اور ایلون مسک اربوں افراد کی مدد کرسکتے ہیں۔
ایلون مسک کی یہ پوسٹ اس وقت سامنے آئی جب ان کی دولت نئے ریکارڈز قائم کر رہی ہے۔
فوربز کے مطابق حال ہی میں ایلون مسک دنیا کے پہلے شخص بنے تھے جن کی مجموعی دولت 800 ارب ڈالرز سے اوپر چلی گئی تھی جو اب گھٹ چکی ہے۔
Leave a Reply