لیموں کو آپ گھر کے اندر ان حیرت انگیز کاموں کے لیے بھی استعمال کرسکتے ہیں

یہ کوئی راز نہیں کہ پانی میں لیموں کے عرق کو شامل کرنے سے صحت کو فائدہ ہوسکتا ہے، مگر کیا آپ کو اس کے دیگر حیران کن فوائد کا علم ہے؟

لیموں سے آپ اپنے گھر میں کافی کچھ ایسا کرسکتے ہیں جس کا تصور بھی نہیں کیا ہوگا۔

یقیناً آپ اسے لیموں پانی کے لیے استعمال کرسکتے ہیں یا مختلف کھانوں کا ذائقہ بڑھا سکتے ہیں، مگر اس سے ہٹ کر بھی لیموں کو گھر کے متعدد کاموں کے لیے استعمال کیا جاسکتا ہے۔

وٹامن سی سے بھرپور لیموں مختلف چیزوں کی صفائی، بدبو کو دور کرنے اور کیڑوں کو بھگانے میں بھی مددگار ثابت ہوسکتا ہے۔

مائیکرو ویو کی صفائی

مائیکرو ویو کے اندر اکثر چکنائی اور دیگر چیزیں جم جاتی ہیں اور لیموں کو اس کی صفائی کے لیے استعمال کیا جاسکتا ہے۔

اس کے لیے ایک کپ میں کچھ مقدار میں پانی اور لیموں کے عرق کو مکس کرکے مائیکرو ویو میں گرم کریں، جس سے چکنائی کی صفائی بہت آسان ہو جائے گی۔

بالوں کی خشکی سے نجات

اگر سر میں کھجلی اور خشکی نے آپ کو تنگ کررکھا ہے تو اس سے ریلیف کے لیے 2 چائے کے چمچ لیموں کے عرق کی مالش اپنے سر پر کریں اور پھر پانی سے دھولیں۔

اس کے بعد ایک چائے کا چمچ لیموں کا عرق ایک کپ پانی میں ملائیں اور اس سے اپنے بال دھولیں۔

اس عمل کو روزانہ اس وقت تک دہرائیں جب تک خشکی غائب نہ ہوجائے۔

کیڑوں کو دور رکھیں

لیموں میں موجود تیزابیت کے باعث یہ گھر سے کیڑوں کو دور رکھنے میں کے لیے بہترین ہوتا ہے۔

لال بیگ سے لے کر چیونٹیوں تک یہ سب کے لیے مؤثر ثابت ہوتا ہے۔

اس کے لیے کیڑوں سے متاثرہ جگہ کو لیموں کے عرق ملے پانی سے دھولیں یا محض لیموں کے عرق کو ہی متاثرہ جگہ پر چھڑک دیں۔

کپڑوں کی سفیدی

اپنے سفید کپڑوں کو زیادہ سفید کرنا چاہتے ہیں تو لیموں کا عرق کپڑے دھونے والے پانی میں ملادیں، آپ کے کپڑے زیادہ جگمگانے لگیں گے جبکہ ان میں لیموں کی خوشبو بھی بس جائے گی۔