پاکستان تحریک انصاف کی خیبرپختونخوا اسمبلی کے پارلیمانی پارٹی اجلاس میں 30 سے زائد اراکین غیر حاضر رہے۔
خیبرپختونخوا کے وزیراعلیٰ سہیل آفریدی کی زیر قیادت پاکستان تحریک انصاف کی پارلیمانی پارٹی کا اجلاس وزیراعلیٰ ہاؤس میں ہوا۔
ذرائع کے مطابق پارلیمانی پارٹی کےاجلاس میں ناراض اراکین نے شرکت نہیں کی اور 92 اراکین پرمشتمل پارلیمانی پارٹی اجلاس میں 30 سے زائد اراکین غیرحاضر رہے۔
ذرائع نے بتایاکہ علی امین گنڈاپور، فضل الہٰی، نیک محمد سمیت دیگر شریک نہیں ہوئے، بیشتر ناراض ارکان نے ملک سے باہر ہونے یا دیگر مصروفیات کوعدم شرکت کی وجہ بتائی۔
ذرائع کا کہنا ہے کہ کابینہ سے متعلق معاملات پرکئی اراکین وزیراعلیٰ سےناراض ہیں، بعض اراکین ترقیاتی کاموں، حلقہ جاتی امور سےمتعلق وزیراعلیٰ سےشکوہ رکھتے ہیں۔
خیال رہے کہ گزشتہ دنوں خبر سامنے آئی تھی کہ خیبر پختونخوا میں پاکستان تحریک انصاف کے 20 سے زیادہ ارکان اسمبلی وزیراعلیٰ سہیل آفریدی سے ناخوش ہیں، تحفظات اور حکمت عملی طے کرنے کیلئے ناراض ارکان کا جلد اجلاس بلائے جانےکا امکان ہے۔
وہیں وزیراعلیٰ خیبرپختونخوا سہیل آفریدی اپنی جماعت کے ناراض ایم پی ایز کو منانے کیلئے متحرک ہوگئے۔ اس حوالے سے خیبرپختونخوا کے وزیر اطلاعات شفیع جان نے دھمکی دی ہے کہ اگر فاروڈ بلاک بنے گا تولوگ سامنے آئیں گے، اگر کوئی ایک بھی ایسی حرکت کرے گا تو کے پی کی زمین اس پر تنگ کر دی جائے گی۔
Leave a Reply