کراچی کے علاقے بہادرآباد میں شہری سے 200 تولہ سونا اور ایک لاکھ ڈالر چھیننے کے واقعے کے بعد متاثرہ شہری سید معاذ علی کا ویڈیو بیان سامنے آگیا جس میں انہوں نے پولیس کے ریکوری کے دعوے کو غلط قرار دیا ہے۔
متاثرہ شہری کا کہنا ہے کہ پولیس نے 200 تولہ سونا ریکور کرنے کا بیان دیا جو کہ غلط ہے، حقیقت میں انہیں صرف 10 فیصد سونا واپس ملا ہے جبکہ 90 فیصد سونا ڈاکو لے گئے۔
سید معاذ علی کے مطابق وہ گھر کی پارکنگ میں گاڑی کھڑی کر رہے تھے کہ ایک موٹر سائیکل پر سوار تین مسلح ڈاکو آئے اور اسلحے کے زور پر 200 تولہ سونا اور ایک لاکھ ڈالر چھین کر فرار ہوگئے۔
یاد رہے کہ 3 فروری کو بہادرآباد کے علاقے فاران سوسائٹی کے رہائشی بینک کے لاکر سے 200 تولہ اور ایک لاکھ امریکی ڈالر لے کر گھر پہنچے۔ اسی دوران گھر کا دروازہ کھلنے پر موٹر سائیکل سوار مسلح افراد بھی گیراج میں داخل ہوئے اور شہری سے زیورات اور ڈالر چھین کر فرار ہوگئے۔
شہری نے ملزمان کا کچھ فاصلے پر تعاقب کیا تاہم ملزمان ایک بڑے اسپیڈ بریکر پر تیز رفتاری کے باعث اپنا توازن برقرار نہ رکھ سکے اور گرگئے جس سے زیورات زمین پر بکھرگئے تاہم اس دوران ملزمان آس پاس موجود سکیورٹی گارڈز کو دیکھ کر فرار ہوگئے۔
واقعے کی اطلاع ملتے ہی پولیس بھی موقع پر پہنچ گئی اور زیورات کو تحویل میں لے لیا ، پولیس کا کہنا تھا کہ 90 فیصد سونا ریکور کرلیا گیا ہے جبکہ ملزمان کی تلاش جاری ہے۔
Leave a Reply