اگر غصہ آیا اور قانون توڑنا پڑا تو 16 سالہ لڑکی سے شادی کرونگا: حافظ حمداللہ

جن لوگوں نے پارلیمنٹ میں بیٹھ کر آئین سے بغاوت کی ہے ان پر تو آرٹیکل 6 لگنا چاہیے، مولانا فضل الرحمان تو سب کچھ آئین کے مطابق کر رہے ہیں: رہنما جے یو آئی__فوٹو: فائل

جمعیت علمائے اسلام (جے یو آئی) کے رہنما حافظ حمد اللّٰہ کا کہنا ہے دوسری شادی کا کوئی ارادہ نہیں ہے لیکن اگر غصہ آیا اور قانون توڑنا پڑا تو 16 سالہ لڑکی سے شادی کروں گا۔

اسلام آباد میں پارلیمنٹ ہاؤس کے باہر گفتگو کرتے ہوئے حافظ حمد اللہ کا کہنا تھا سربراہ جے یو آئی مولانا فضل الرحمان کو مشورہ دیتا ہوں کہ بیرون ملک کے دورے سے واپسی پر چاروں صوبوں میں اجتماعی شادیوں کا اہتمام کریں۔

انہوں نے کہا کہ اجتماعی شادیوں میں نوجوانوں کی شادیاں کریں جو بالغ ہو چکے ہوں اور ان کی عمریں 18 سال سے کم ہوں۔

حافظ حمداللہ نے کہا کہ ہم قانون کو پاؤں تلے روندیں گے کیونکہ جو قانون قرآن و سنت کے منافی ہو، ہم اس کو تسلیم نہیں کریں گے، یہ اسلامی جمہوریہ پاکستان ہے۔

ان کا کہنا تھا کہ یہ آئین میں ہے کہ قرآن اور سنت کے خلاف کوئی قانون سازی نہیں کی جائے گی۔

حافظ حمداللہ نے مزید کہا کہ جن لوگوں نے پارلیمنٹ میں بیٹھ کر آئین سے بغاوت کی ہے ان پر تو آرٹیکل 6 لگنا چاہیے، مولانا صاحب سب کچھ آئین کے مطابق کر رہے ہیں۔

انہوں نے کہا اگرچہ میں دوسری شادی و نکاح کے موڈ میں نہیں ہوں، لیکن اگر مجھے غصہ آیا تو میں بھی 16 سال کی لڑکی سے شادی کروں گا۔

Source link