ایران میں بڑھتی ہوئی مہنگائی اور کرنسی کی قدر میں کمی کے خلاف جاری احتجاج مختلف شہروں تک پھیل گئے، پُرتشدد مظاہروں میں 6 افراد جان سے ہاتھ دھو بیٹھے۔
ایرانی میڈیا کے مطابق ایران کے لورِستان، فسا اور ازنا شہر میں مظاہرین اور سکیورٹی فورسز کے درمیان جھڑپیں ہوئیں، کئی شہروں میں مظاہرین نے سرکاری عمارتوں پر بھی دھاوا بولا، پولیس اسٹیشن نذر آتش کرنے کی کوشش کی۔
رپورٹس کے مطابق پولیس نے مظاہرین کو منتشر کرنے کے لیے ہوائی فائرنگ، ربڑ کی گولیوں اورآنسو گیس کا استعمال کیا۔
ایرانی میڈیا کے مطابق مظاہرین اور سکیورٹی فورسز کے درمیان جھڑپوں میں ایک سکیورٹی اہلکار سمیت 6 افراد جاں بحق جبکہ متعدد افراد زخمی ہوئے۔ پولیس نے ہنگامہ آرائی میں ملوث کئی افراد کو گرفتار کرلیا۔
ایرانی میڈیا کے مطابق شہریوں کی جانب سے احتجاج بڑھتی مہنگائی اور کرنسی کی گرتی ہوئی قدر کے خلاف کیا جارہا ہے، دارالحکومت تہران سے شروع ہونے والے احتجاجی مظاہرے اب ملک کے دیگر شہروں تک پھیل چکے ہیں۔
یاد رہے کہ مغربی پابندیوں کی وجہ سے ایرانی ریال مسلسل گراوٹ کا شکار ہے جس کی وجہ سے مہنگائی میں تیزی سے اضافہ ہو رہا ہے۔
Leave a Reply