عمر بڑھنے کے ساتھ جسمانی طور پر مضبوط رہنا بہت آسان

عمر بڑھنے کے ساتھ جسمانی تنزلی کی رفتار بڑھ جاتی ہے مگر چند عام چیزوں کے ذریعے آپ اس کی روک تھام کرسکتے ہیں۔

جی ہاں واقعی یہ بہت آسانی سے ممکن ہے اور اس کے لیے درحقیقت زیادہ محنت کرنے کی بھی ضرورت نہیں۔

بس روزانہ پہیلیوں کو حل کرنا اور لوگوں سے میل جول معمول بنالیں۔

یہ بات ایک طبی تحقیق میں سامنے آئی۔

اس تحقیق میں 12 ہزار سے زائد معمر افراد کو شامل کیا گیا۔

تحقیق میں دیکھا گیا تھا کہ دماغی طور پر متحرک رہنے اور سماجی میل جول سے کیا اثرات مرتب ہوتے ہیں۔

ان افراد کے معمولات کا جائزہ 11 سال تک لیا گیا، جس دوران ہر سال مختلف امراض کی علامات کی جانچ پڑتال کی گئی۔

نتائج سے معلوم ہوا کہ سماجی میل جول اور دماغ کو متحرک کرنے والی سرگرمیوں جیسے پہیلیاں حل کرنے یا دیگر سے جسمانی صحت کو فائدہ ہوتا ہے۔

ایسے افراد میں جسمانی کمزوری کا خطرہ 3 فیصد تک گھٹ جاتا ہے۔

محققین نے بتایا کہ دماغ متحرک کرنے والی سرگرمیاں جیسے پہیلیاں حل کرنے یا تاش یا شطرنج کھیلنے سے جسمانی کمزوری کا خطرہ 4 فیصد تک گھٹ جاتا ہے۔

تعلیمی ٹاسک جیسے لکھنے، کمپیوٹر کے استعمال یا تعلیمی کلاسز کا حصہ بننے سے یہ خطرہ 2 فیصد تک کم ہو جاتا ہے۔

انہوں نے مزید بتایا کہ خواتین کو ان سرگرمیوں سے مردوں کے مقابلے میں زیادہ فائدہ ہوتا ہے جن میں جسمانی کمزوری کا خطرہ 3 سے 6 فیصد تک کم ہو جاتا ہے۔