رمضان المبارک کے آغاز سے قبل، وزیرِ اعظم شہباز شریف نے 38 ارب روپے کے رمضان ریلیف پیکج کا اعلان کیا، جس کے تحت پاکستان بھر کے 12.2 ملین (ایک کروڑ 22 لاکھ) کم آمدنی والے خاندانوں کو 13ہزار روپے ڈیجیٹل طور پر منتقل کیے جائیں گے۔
اس اعلان کے فوراً بعد، انٹرنیٹ پر ایک پیغام گردش کرنے لگا جس میں ایک ویب لنک دیا گیا تھا اور لوگوں کو ہدایت کی گئی تھی کہ وہ وفاقی حکومت سے اپنا رمضان پیکج حاصل کرنے کے لیے اس لنک پر رجسٹریشن کرائیں۔
تاہم، یہ ویب سائٹ جعلی ہے اور اس کا حکومت سے کوئی تعلق نہیں ہے۔
دعویٰ
25 فروری کو، ایک فیس بک صارف نے ایک لنک “https://rahmadani.org/Prime-Minister-Rs13000-Ramadan” شیئر کیا، جس میں پاکستانی شہریوں کو وزیرِ اعظم کے رمضان ریلیف پیکج کے حصے کے طور پر 13 ہزار روپے حاصل کرنے کی ترغیب دی گئی تھی۔
اس پوسٹ میں دعویٰ کیا گیا تھا کہ اگر صارفین دیے گئے لنک پر کلک کریں اور چند سوالات کے جوابات دیں، تو انہیں فوری طور پر 13 ہزار روپے موصول ہو جائیں گے۔
اس پوسٹ میں وزیرِ اعظم شہباز شریف کی ایک تصویر بھی شامل تھی جس پر یہ تحریر لکھی تھی:”پاکستان کے وزیر اعظم شہباز شریف کا 13000 روپے کا رمضان پیکج سب کے لیے اسے کیسے حاصل کیا جائے،نیچے دیے گئے لنک پر جائیں اور درج ذیل سوالات کے جوابات دیں اور آپ کو رمضان کی تقریبات کے لیے فوری طور پر 13000 روپے وصول کریں، مجھے ابھی اپنا ملا۔“
حقیقت
حکام نے تصدیق کی ہے کہ یہ آن لائن لنک جعلی ہے اور اس کا وزیرِ اعظم کے رمضان ریلیف پروگرام سے کوئی تعلق نہیں ہے۔
اسلام آباد میں وزارتِ تخفیفِ غربت و سماجی تحفظ (Ministry of Poverty Alleviation and Social Safety) کے سیکشن آفیسر، عادل حسین نےجیو فیکٹ چیک کو فون پر بتایا کہ گردش کرنے والا یہ لنک ایک فراڈ یا اسکیم(scam) ہو سکتا ہے۔
عادل حسین نے مزید بتایا کہ جو لوگ رمضان ریلیف پیکج کے لیے اپنی اہلیت کی جانچ کرنا چاہتے ہیں، وہ 9999 ہیلپ لائن پر کال کر سکتے ہیں، جہاں ایک نمائندہ ان کے کمپیوٹرائزڈ قومی شناختی کارڈ (CNIC) کی تصدیق کر کے انہیں ان کی حیثیت (اسٹیٹس) کے بارے میں مطلع کر سکتا ہے۔
انہوں نے مزید وضاحت کی کہ بے نظیر انکم سپورٹ پروگرام (BISP) کے مستحقین کی شناخت پہلے ہی کی جا چکی ہے اور رمضان ریلیف پیکج 2026 کے لیے رجسٹریشن کرانے یا رقم حاصل کرنے کے لیے کوئی درخواستی عمل، ویب پورٹل یا ویب سائٹ موجود نہیں ہے۔
پریس انفارمیشن ڈیپارٹمنٹ (PID) کے ڈپٹی ڈائریکٹر (ڈیجیٹل)، اسد شبیر نےجیو فیکٹ چیک کو پیغامات کے ذریعے بتایا کہ نقد رقم کی منتقلی کے لیے اپنے اسٹیٹس چیک کرنے کی درست ویب سائٹ http://pmrrp.nitb.gov.pk/ ہے اور ہیلپ لائن نمبر 9999 ہے۔
یہ بات بھی قابلِ غور ہے کہ حکومتِ پاکستان کی ویب سائٹس کا ڈومین ہمیشہ ”gov.pk“ ہوتا ہے۔ انٹرنیٹ پر گردش کرنے والی ویب سائٹ کا ایڈریس اس ڈومین پر ختم نہیں ہوتا۔
فیصلہ: 13 ہزار روپے کے رمضان ریلیف پیکج کی رجسٹریشن کے لیے گردش کرنے والی ویب سائٹ جعلی ہے اور اس کا حکومتی پروگرام سے کوئی تعلق نہیں ہے۔ حکام کے مطابق رجسٹریشن کے لیے کوئی آن لائن پورٹل موجود نہیں ہے اور اہلیت کی تصدیق صرف سرکاری ویب سائٹ یا 9999 ہیلپ لائن پر کال کر کے ہی کی جا سکتی ہے۔
ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔ اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔
Leave a Reply