کراچی میں پسند کی شادی کرنے والے جوڑے کو قتل کرنے والا ملزم گرفتار کرلیا گیا۔
پولیس کا بتانا ہے کہ ملزم ساجد مقتولہ نادیہ کا بھائی ہے جس نے غیرت کے نام پر بہن اور بہنوئی کی جان لی۔
دلخراش واقعہ اُس وقت پیش آیا جب نادیہ پیر کے روز اپنے شوہر نجیع اللہ کے ساتھ ملیر کورٹ سے کار میں واپس جارہی تھی۔
اس دوران موٹر سائیکل پر 2 ملزمان قریب آئے اور پیچھے بیٹھے ملزم نے چلتی کار پر فائرنگ شروع کردی۔ موٹر سائیکل چلانے والا ملزم تاحال مفرور ہے۔
پولیس کا دعوی ہے کہ ملزم نے ملیر سعود آباد میں بہن اور بہنوئی کو قتل کرنے کا اعتراف کرلیا ہے۔
ملزم نے پولیس کو بتایا ہے کہ بہن کی سعید گوپانگ سے ساڑھے 3 لاکھ روپے میں منگنی ہوئی تھی تاہم بہن نے پسند کی شادی کرلی تو سعید گوپانگ پیسے کی واپسی کا تقاضا کرنے لگا۔ پیسہ واپس نہ ملنے پر سعید گوپانگ کی طرف سے بہن کو قتل کرنے کی شرط رکھی گئی تھی۔
پولیس کے مطابق قتل کے وقت موٹر سائیکل چلانے والا شخص عابد گوپانگ ہے جو ملزم سعید گوپانگ کا حقیقی بھائی ہے۔
پولیس کا کہنا ہے کہ واردات کا مقدمہ مقتول کے بھائی عثمان کی مدعیت میں تھانا سعود آباد میں درج کرلیا گیا ہے۔
Leave a Reply