کیا آپ دنیا کے پہلے ‘تیرتے شہر’ میں رہنا پسند کریں گے جس میں 80 ہزار افراد کی رہائش کا انتظام کیا جائے گا اور وہ بڑے کروز جہازوں کو بونا بنا دے گا۔
اگر ہاں تو ایک کمپنی فریڈم کروز اس کو ممکن بنانا چاہتی ہے۔
اس شہر کو جوہری توانائی سے چلایا جائے گا جبکہ کمپنی کے چیف ایگزیکٹو روجر گوچ کے مطابق انہیں یقین ہے کہ ہم ایسا کرکے دکھائیں گے۔
یہ بنیادی طور پر ایک بہت بڑا بحری جہاز ہوگا جس میں 80 ہزار افراد قیام کرسکیں گے جو دنیا کے سب سے بڑے کروز جہاز رائیل کیرئیبین کے مقابلے میں بہت بڑا ہوگا۔
رائل کیرئیبین میں 7600 مسافروں اور 2350 عملے کے افراد ایک وقت میں سفر کرسکیں گے۔
اس فریڈم شپ کی تیاری کی لاگت کا تخمینہ 16.16 ارب ڈالرز لگائی گئی ہے جس میں 50 ہزار افراد مستقل قیام کرسکیں گے، 10 ہزار سیاح اور 80 ہزار عملے کے افراد سوار ہوں گے۔
کمپنی کے مطابق فریڈم شپ کو آپ سمندر پر ایک مستقل موبائل شہر قرار دے سکتے ہیں جس میں لوگ طویل المعیاد بنیادوں پر قیام کرسکیں گے۔
کمپنی نے بتایا کہ یہ کوئی ایک سے دوسری جگہ سفر کرنے والا بحری جہاز نہیں ہوگا بلکہ اسے شہری ماحول کو مدنظر رکھ کر ڈیزائن کیا جائے گا اور اس میں ہر طرح کی سہولیات دستیاب ہوں گی۔
یہ بہت بڑا جہاز اسکولوں، کالجوں، دکانوں، بینکوں اور نائٹ کلبز وغیرہ سے بھی لیس ہوگا جبکہ اس میں ایک 2 منزلہ فوڈ ہال ہوگا جہاں طرح کے پکوان دستیاب ہوں گے۔
اس مجوزہ بحری جہاز کی لمبائی ایک میل کی ہوگی جبکہ اس میں رہنے والوں کے لیے ٹرام سروس بھی چلائی جائے گی جو جہاز کے مختلف حصوں سے کنکٹ ہوگی۔
جہاز میں 15 ہزار نشستوں پر مبنی اسپورٹس اسٹیڈیم بھی ہوگا جبکہ واٹر پارک، باغات، کنونشن سینٹر، میوزک ہال اور 2 میوزیم بھی تعمیر کیے جائیں گے۔
روجر گوچ نے بتایا کہ ہم اس میں پیدل چلنے کی جگہیں اور سرسبز مقامات کو بھی تعمیر کریں گے۔
اسی طرح ایک بہت بڑا ایکوریم بھی ہوگا جس میں غوطہ خور ڈائیو کرسکیں گے۔
یہ تیرتا ہوا شہر 2 سے 3 برسوں میں پوری دنیا کے گرد چکر لگائے گا۔
روجر گوچ نے بتایا کہ اس جہاز کی تعمیر 4 سال میں مکمل ہوگی مگر اولین رہائشی تیاری کے مرحلے کے دوران ہی اس میں منتقل ہوسکیں گے۔
مگر فی الحال یہ ایک تصور ہے اور اس پر کب تک کام شروع ہوگا، ابھی یہ کہنا مشکل ہے۔
Leave a Reply