علی لاریجانی کی زندگی، جدوجہد اور سیاسی سفر پر ایک نظر

فوٹو: فائل

بے خوف، نڈر ، بہادر ، امریکا اور اسرائیل کو للکارنے والے ایرانی قومی سلامتی کونسل کے سربراہ علی لاریجانی عراق کے شہر نجف میں پیدا ہوئے تھے۔

علی لاریجانی نے میتھمیٹکس اور کمپیوٹر سائنس میں بیچلر کی ڈگری حاصل کی۔ بعد ازاں انہوں نے تہران یونیورسٹی سے فلسفے میں پی ایچ ڈی کی ڈگری حاصل کی، جرمن فلسفی عمانویل کانٹ کے فلسفے پر وہ اکثرمضامین لکھا کرتے تھے۔

67 سالہ علی لاریجانی نے ایران کی پاسداران انقلاب میں شمولیت کے بعد اسلامی جمہوریہ ایران کے اندر نمایاں مقام حاصل کیا، وہ ایران کی داخلی سیاست، پارلیمنٹ اور خارجہ پالیسی میں طویل عرصے سے بااثر کردار ادا کرتے رہے۔

وہ ایران کے طاقتور مذہبی و سیاسی خاندان سے تعلق رکھتے تھے اور ایران کی سب سے طاقتور شخصیات میں سے ایک تھے، صدارتی سیاست میں بھی سرگرم رہے، متعدد بار صدارتی انتخابات میں بھی اہم امیدوار رہے۔

علی لاریجانی 5 عشروں سے ایران میں مختلف اہم عہدوں پر اہم خدمات انجام دیتے رہےتھے، انکے بارے میں کہا جاتا تھا کہ سوائے ملک کا صدر ہونے کے علی لاریجانی نے تمام بڑے عہدوں پر خدمات انجام دی تھیں۔

علی لاریجانی سکیورٹی پالیسی کے معمار اور خامنہ ای کے قریبی مشیر سمجھے جاتے تھے، وہ ایران عراق جنگ کے سابق کمانڈر اور اہم سرکاری عہدوں پر بھی فائز رہے۔

شہید علی لاریجانی نے بطور اسپیکر پارلیمنٹ 12 سال تک مجلسِ شورٰی کی قیادت کی، وہ ایران کے چیف مذاکرات کار برائے جوہری پروگرام بھی رہ چکے ہیں اور انہوں نے اوباما دور میں ہوئی نیوکلیئر ڈیل کو اس اشو پر بہتر ہم آہنگی کی بنیاد قرار دیا تھا۔

اگست 2025 سے وہ ایرانی کی قومی سلامتی کونسل کے سربراہ تھے، یہ کونسل ملک کے دفاع، انٹیلی جنس اور خارجہ پالیسی امور پر نظر رکھتی ہے، علی لاریجانی اگست 2005 سے اکتوبر 2007 تک بھی اس عہدے پر خدمات انجام دے چکے تھے، وہ وزیرثقافت بھی رہ چکےتھے ۔

علی لاریجانی کو ایران کی قدامت پسند مگر نسبتاً معتدل سوچ رکھنے والی سیاسی شخصیت سمجھا جاتا تھا۔

علی لاریجانی کی جان کوخطرہ تھا، امریکا نے انکے سرکی قیمت مقرر کررکھی تھی مگر القدس ریلی میں وہ عام لوگوں کی طرح سڑک پر مارچ کرتے نظرآئے تھے۔

صدر ٹرمپ کی جانب سے سرکی قیمت مقررکیے جانے پر ڈاکٹر علی لاریجانی نے امام حسین کا قول سوشل میڈیا پر شیئر کرتے ہوئےلکھا تھا کہ ’میں موت کو خوشی کے سوا کچھ نہیں اور ظالموں کے ساتھ زندگی کو غم کے سوا کچھ نہیں سمجھتا۔‘

حالیہ بیانات میں علی لاریجانی نے کہا تھا امریکا کے برعکس ایران نے طویل جنگ کی تیاری کررکھی ہے۔

کچھ ہی روز پہلے انہوں نے اپنے بیان میں کہا تھا کہ خلیجی ممالک جانتے ہیں کہ امریکا انکا وفادار نہیں اور یہ بھی کہ اسرائیل انکا دشمن ہے، اس لیے ایک لمحہ کو رک کراپنے بارے میں اور اس خطے کے مستقبل کے بارے میں سوچیں۔