سکیورٹی فورسز نے خیبرپختونخوا میں دو مختلف کارروائیاں کرکے بھارتی اسپانسرڈ فتنہ الخوارج کے 4 دہشتگردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے دونوں کارروائیاں 3 اور 4 جون کی درمیانی شب کیں۔
سکیورٹی فورسز نے خوارج کی موجودگی کی اطلاع پر ڈیرہ اسماعیل خان میں انٹیلیجنس بنیادوں پر آپریشن کیا اور خوارج کے ٹھکانےکو مؤثر انداز میں نشانہ بنایا، ڈی آئی خان میں شدید فائرنگ کے تبادلےکے بعد فتنہ الخوارج کے 2 دہشت گردوں کو ہلاک کیاگیا۔
آئی ایس پی آر کے مطابق دوسرا آپریشن مہمند میں انٹیلیجنس بنیادوں پر کیا گیا جہاں مزید 2 خوارج ہلاک کردیےگئے، ہلاک ہونے والے خوارج کے قبضے سے اسلحہ اور گولہ بارود برآمد کرلیا گیا۔
آئی ایس پی آر کے مطابق یہ عناصر علاقے میں دہشت گردی کی متعدد کارروائیوں میں ملوث تھے، علاقے میں موجود کسی بھی دوسرےخارجی کےخاتمے کیلئے کلیئرنس آپریشن جاری ہے۔
آئی ایس پی آر کے مطابق غیر ملکی سرپرستی اور حمایت یافتہ دہشتگردی کے ناسور کے مکمل خاتمے تک انسدادِ دہشت گردی مہم جاری رکھیں گے۔
وزیراعظم کا ڈی آئی خان اور مہمند میں 4 دہشتگردوں کو ہلاک کرنے پر فورسزکو خراج تحسین
وزیراعظم شہباز شریف نے ڈی آئی خان اور مہمند میں 4 دہشت گردوں کو ہلاک کرنے پر فورسز کو خراج تحسین پیش کیا، وزیراعظم نے کہا کہ بھارتی سرپرستی میں سرگرم فتنہ الخوارج کے دہشت گردوں کے خلاف مؤثر کارروائی قابلِ ستائش ہے۔
وزیراعظم نے کہا کہ دہشت گردی کے ناسور کے مکمل خاتمے تک اداروں کی کارروائیاں جاری رہیں گی، قوم اپنی بہادر مسلح افواج اور سکیورٹی اداروں کی قربانیوں کو قدر کی نگاہ سے دیکھتی ہے، پاکستان کے امن، استحکام اور سلامتی کے خلاف ہر سازش کو ناکام بنائیں گے۔
Leave a Reply