ریاض: ترک صدر رجب طیب اردوان کا کہنا ہےکہ ترکیے قابل تجدید توانائی اور دفاعی صنعت سمیت مختلف شعبوں میں سعودیہ کے ساتھ تعلقات بلند سطح پر لےجانا چاہتا ہے۔
عرب میڈیا کے مطابق ترک صدر سعودی دارالحکومت ریاض کے کنگ خالد انٹرنیشنل ائیرپورٹ پہنچے تو بنفشئی کارپٹ پر ان کا استقبال ریاض ریجن کے ڈپٹی گورنر شہزادہ محمد بن عبدالرحمان نےکیا۔
ترک صدر ائیرپورٹ سے ریاض کے قصر الیمامہ پہنچے جہاں سعودی ولی عہد شہزادہ محمد بن سلمان نے ان کا خیرمقدم کیا۔ اس موقع پر ترک صدر کے لیے سرکاری استقبالیہ تقریب کا اہتمام کیا گیا۔
ترک میڈیا کے مطابق سعودی ولی عہد اور ترک صدر نے باضابطہ ملاقات کی جس میں دونوں ممالک کے تعلقات، تعاون کے راستوں اور مختلف شعبوں میں تعلقات کو مزید کو فروغ دینے پر گفتگو ہوئی۔
سعودی ولی عہد اور ترک صدر نے علاقائی اور بین الاقوامی صورتحال پر تبادلہ خیال کیا۔
اس موقع پر ترک صدر کا کہنا تھا کہ شام میں استحکام کے لیے ترکیے کی حمایت جاری رہے گی اور ترکیے شام کی تعمیر نو کے لیے سعودی عرب کے ساتھ تعاون کرےگا۔
ترک صدر کا کہنا تھا کہ ترکیے قابل تجدید توانائی، دفاعی صنعت سمیت مختلف شعبوں میں دونوں ملکوں کے تعلقات بلند سطح پر لےجانا چاہتا ہے۔
رجب طیب اردوان کا کہنا تھا کہ ترکیے غزہ کی تعمیر نو کے لیے اپنی کوششیں جاری رکھے ہوئے ہے۔انہوں نے انسانی بحران کے خاتمے کے لیے مزید اقدامات کی ضرورت پر زور دیا۔
دونوں رہنماؤں نے یمن کی تازہ صورتحال اور مشرقی افریقا میں ہونے والی پیش رفت پر بھی تفصیلی گفتگو کی۔
Leave a Reply