ممبئی: بورڈ آف کنٹرول فار کرکٹ ان انڈیا (بی سی سی آئی) نے نیوزی لینڈ کے خلاف پانچ میچوں کی ٹی 20 سیریز کے لیے اسکواڈ کا اعلان کردیا۔
نیوزی لینڈ کے خلاف 22 اکتوبر سے شروع ہونے والی ٹی 20 انٹرنیشنل سیریز کے لیے بھارتی اسکواڈ میں کوئی بڑی تبدیلیاں نہیں کی گئیں اور پرانی ٹیم کو ہی برقرار رکھا گیا تاہم سب سے اہم بات بھونیشور کمار کی شمولیت ہے جو تقریباً چار سال بعد ہندوستانی اسکواڈ میں واپس آئے ہیں۔
اس سے قبل وہ نومبر 2022 میں ایڈیلیڈ اوول میں انگلینڈ کے خلاف ٹی 20 ورلڈ کپ کے سیمی فائنل میں آخری بار کھیلے تھے۔
بھونیشور کمار نے انڈین پریمیئر لیگ (آئی پی ایل) کے گزشتہ دو سیزنز میں رائل چیلنجرز بنگلورو کے لیے شاندار کارکردگی کا مظاہرہ کرتے ہوئے مجموعی طور پر 45 وکٹیں حاصل کیں، ان کی کارکردگی فرنچائز کی جانب سے لگاتار ٹورنامنٹ جیتنے میں کلیدی حیثیت رکھتی تھی۔
فاسٹ بولر کو حال ہی میں ‘ہانگ کانگ سکسز’ کے لیے ہندوستان کا کپتان مقرر کیا گیا تھا لیکن نیوزی لینڈ کے خلاف ٹی 20 سیریز کے اسکواڈ میں شمولیت کے باعث 36 سالہ کھلاڑی اب اس ٹورنامنٹ میں شرکت نہیں کر سکیں گے۔
‘بھارتی ٹیم کی قیادت شریاس آئیر کریں گے جبکہ تلک ورما نائب کپتان کے فرائض انجام دیں گے، ویبھو سوریا ونشی نے ٹیم میں اپنی جگہ برقرار رکھی ہے، اسکواڈ میں جسپریت بمراہ شامل نہیں ہیں انہیں آرام دیا گیا ہے۔
ورون چکرورتی، جو افغانستان کے خلاف سیریز کے دوران زخمی ہو گئے تھے مکمل فٹنس بحال کر چکے ہیں اور اسی لیے انہیں نیوزی لینڈ کے خلاف ٹی 20 سیریز کے لیے ٹیم میں شامل کیا گیا ہے۔
واضح رہے کہ بھارت کو نیوزی لینڈ کے خلاف پانچ ٹی 20، پانچ ون ڈے اور دو ٹیسٹ میچ کھیلنے ہیں، تاہم سلیکٹرز نے ابھی تک دیگر دو سیریز کے لیے ٹیم کا اعلان نہیں کیا ہے۔
علاوہ ازیں سلیکشن کمیٹی نے نیوزی لینڈ ‘اے’ کے خلاف تین ملٹی ڈے میچوں کے لیے ‘انڈیا اے’ اسکواڈ کا بھی اعلان کیا ہے جس میں کے ایل راہول، دیودت پڈیکل، رشبھ پنت، دھرو جوریل اور واشنگٹن سندر کو شامل کیا گیا ہے، ٹیم انتظامیہ چاہتی ہے کہ دو ٹیسٹ میچوں کی سیریز سے قبل ان کھلاڑیوں کو نیوزی لینڈ کے حالات میں کھیلنے کا تجربہ حاصل ہو۔
