تصور کریں کہ آپ سمندر میں پھنس جائیں اور کھانے کے لیے کچھ نہ ہو تو کیا کریں گے؟
یقین کرنا مشکل ہوگا مگر چین میں ایک شخص 7 دن تک سمندر میں پھنسے رہنے کے باوجود کرشماتی طور پر زندہ بچ گیا۔
چِن نامی شخص کو جون 2026 کے شروع میں صوبہ ہینان کی چینگ مائی کاؤنٹی کے قریب سمندر میں 2 ماہی گیروں نے بچایا۔
27 مئی کو یہ شخص ہینان کے صدر مقام Haikou کے ساحل پر چہل قدمی کر رہا تھا جب تند و تیز لہروں میں بہہ گیا۔
39 سالہ چِن کا تعلق گوانگشی سے ہے اور وہ اس جگہ سیاحت کے لیے آئے تھے۔
اس سے قبل انہوں نے کبھی بھی سمندر میں تیراکی نہیں کی تھی اور چہل قدمی کے دوران ان کے پاس زندگی بچانے والی کوئی چیز نہیں تھی۔
چِن گہرے پانیوں میں پہنچ گئے اور مدد کے لیے فون بھی نہیں کرسکے کیونکہ ان کا موبائل فون گم ہوگیا تھا۔
وزن کم کرنے کے لیے انہوں نے ٹراؤزر، جوتوں، گھڑی اور انگوٹھی کو اتار دیا جبکہ سمندر میں بہتے رہے۔
اگلے دن وہ سمندر میں تیرنے والے ایک buoy پر چڑھ گئے اور بچائے جانے تک وہاں رہے۔
تیسرے دن انہیں احساس ہوا کہ وہ آبنائے Qiongzhou میں موجود ہیں جو صوبہ گوانگ ڈونگ کو ہینان سے الگ کرتا ہے اور وہاں دور سے کچھ کشتیاں بھی گزریں مگر کوئی بھی انہیں دیکھ نہیں سکا۔
اگلے 2 دن چِن کے لیے بہت مشکل ثابت ہوئے اور خوراک نہ ہونے کے باعث بھوک کی شدت سے بے حال ہوکر انہوں نے 80 چھوٹے کیکڑے کچے کھالیے جبکہ واہموں کا سامنا بھی ہوا۔
7 ویں دن چِن کو 2 ماہی گیروں نے دریافت کیا اور ایک ڈنڈا پکڑایا تو چِن کو لگا کہ یہ دروازہ ہے اور دوستوں نے رات کے کھانے پر مدعو کیا ہے۔
ماہی گیروں نے میڈیا سے بات کرتے ہوئے بتایا کہ ہم نے چِن کو کہا کہ اب تم ہمارے ساتھ ہو اور ہم تم کو مرنے نہیں دیں گے۔
انہوں نے چِن کو صاف کیا اور خشک کپڑے پہنائے جبکہ انہوں نے متاثرہ شخص کے جسم میں متعدد زخموں کو بھی دریافت کیا جو سورج کی روشنی کے باعث خراب ہوچکے تھے۔
ماہی گیروں نے چِن کو پانی دیا اور اس سے مسلسل بات کرتے رہے تاکہ وہ بے ہوش نہ ہو جائے۔
سمندر سے باہر نکلنے پر چِن کو فوری طور پر اسپتال پہنچایا گیا۔
چِن نے اس موقع پر کہا کہ ‘جب میں سمندر میں تھا تو میں نے خود کو کہا تھا کہ میں اس طرح نہیں مرسکتا’۔
انہوں نے مزید بتایا کہ ‘جب میں ٹھیک ہو جاؤں گا تو یقیناً اپنے دونوں بھائیوں سے مل کر ان کا شکریہ ادا کروں گا’۔
اسپتال انتظامیہ نے بتایا کہ چِن کو آئی سی یو میں رکھنے کے بعد عام وارڈ میں منتقل کر دیا گیا ہے اور اب ان کی حالت مستحکم ہے۔
جب چِن کو اسپتال میں داخل کرایا گیا تو وہ شدید ڈی ہائیڈریشن کے شکار تھے جبکہ جِلد کا بیشتر حصہ متاثر ہوچکا تھا۔
اسی طرح نظام ہاضمہ پھول گیا تھا جو کہ ممکنہ طور پر کچے کیکڑے کھانے کا نتیجہ تھا۔
Leave a Reply