ایکس (ٹوئٹر) اور یوٹیوب پر گردش کرنے والی ایک ویڈیو اس دعویٰ کے ساتھ شیئر کی جا رہی ہے کہ یہ پاکستان کے صوبہ بلوچستان کے شہر کوئٹہ کے سول اسپتال کی ہے، جہاں مریضوں اور اسپتال کے بستروں کے پاس چوہے آزادانہ گھوم رہے ہیں۔
یہ دعویٰ غلط ہے۔ یہ فوٹیج بھارت کی ریاست اتر پردیش کے ایک سرکاری اسپتال میں ریکارڈ کی گئی تھی۔
دعویٰ
21 مئی 2026 کو، ایکس پر متعدد صارفین نے 32 سیکنڈ کی ایک ویڈیو شیئر کی جس کے بارے میں یہ دعویٰ کیا گیا کہ یہ کوئٹہ کے سول اسپتال کے وارڈز میں گھومتے ہوئے چوہوں کی ہے، جبکہ مریض قریب ہی آرام کر رہے تھے۔ ایک صارف نے صوبائی حکام پر زور دیا کہ وہ اس ”انتہائی خوفناک“ فوٹیج کا نوٹس لیں۔
اس آرٹیکل کے شائع کیے جانے کے وقت تک ان میں سے ایک پوسٹ کو 1 لاکھ 4 ہزار 900 سے زائد ویوز، 952 لائکس اور 621 ری پوسٹس ملے۔
یہ فوٹیج ایکس اور یوٹیوب پر دیگر صارفین کی جانب سے بھی اسی طرح کے دعووں کے ساتھ شیئر کی گئی۔
حقیقت
اس ویڈیو کا تعلق کوئٹہ کے سول اسپتال سے نہیں ہے۔
ریورس امیج سرچ کے ذریعے یہی فوٹیج بھارتی میڈیا ادارے دی ٹائمز آف انڈیا کی 16 جنوری 2026 کی ایک انسٹاگرام پوسٹ میں ملی۔ اس ادارے نے واضح کیا کہ یہ ویڈیو بھارت کی ریاست اتر پردیش کےگورنمنٹ میڈیکل کالج گونڈہ کے آرتھوپیڈک (ہڈیوں کے) وارڈ کے اندر کی ہے۔ یہ پوسٹ یہاں دیکھی جا سکتی ہے۔
ٹائمز ناؤ(Times Now)، دی انڈین ایکسپریس اور دی ٹیلی گراف انڈیا سمیت دیگر بھارتی میڈیا اداروں نے بھی اس وقت اس واقعے کی رپورٹنگ کی تھی۔ ان کی رپورٹس میں بھی اس جگہ کی شناخت گورنمنٹ میڈیکل کالج گونڈہ کے طور پر کی گئی اور بتایا گیا کہ انٹرنیٹ پر یہ فوٹیج سامنے آنے کے بعد اسپتال کے حکام نے معاملے کی انکوائری شروع کر دی تھی۔ یہ رپورٹس یہاں، یہاں اور یہاں پڑھی جا سکتی ہیں۔
ان رپورٹس میں پاکستان یا کوئٹہ کے سول اسپتال کا کوئی ذکر نہیں ہے۔
فیصلہ: چوہوں کی یہ وائرل ویڈیو غلط طور پر کوئٹہ کے سول اسپتال سے منسوب کی گئی تھی۔
ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔
Leave a Reply