بھارت: میٹا نے پولیس کو انسٹاگرام پوسٹ کا الرٹ بھیج کر نوجوان کی زندگی بچا لی۔
بھارتی میڈیا کے مطابق میرٹھ کے علاقے سردھنا میں ایک نوجوان کی جانب سے اپنے گھر سے سوشل میڈیا اکاؤنٹ انسٹاگرام پر ایک ویڈیو شیئر کی گئی جس میں اسے سفید رنگ کے محلول کو پیتے دیکھا گیا اور ساتھ ہی کیپشن میں لکھا کہ ‘اب تم خوش رہنا اپنی زندگی میں۔’
پولیس کے مطابق نوجوان کی پوسٹ کے بعد میٹا نے شام 6:53 بجے پولیس ہیڈ کوارٹر کے سوشل میڈیا سینٹر کو پوسٹ کے حوالے سے خودکشی کا الرٹ بھیجا۔
ڈائریکٹر جنرل آف پولیس کی ہدایت پر عمل کرتے ہوئے سینٹر نے دستیاب موبائل نمبر اور مقام کی تفصیلات کی بنیاد پر فوری طور پر میرٹھ پولیس کو مطلع کیا جس کے بعد پولیس نوجوان کے گھر پہنچ گئی جہاں اسے تشویشناک حالت میں پایا گیا
پولیس کے مطابق نوجوان کے پاس سفید رنگ کے محلول کی بوتل بھی موجود تھی، فیملی کی مدد سے پولیس نے نوجوان کو فوری اسپتال روانہ کیا جہاں اسے طبی امداد دے کر اس کی زندگی کو بچالیا گیا۔
پولیس کے مطابق پوچھ گچھ کے دوران نوجوان نے بتایا کہ کسی سے تعلق شپ ختم ہونے کے بعد وہ ذہنی تناؤ کا شکار تھا جس کی وجہ سے اس نے انتہائی اقدام اٹھانے کی کوشش کی۔
پولیس نے مزید بتایا کہ 2022 سے میٹا کے ساتھ کوآرڈینیشن کے تحت کام کیا جارہا ہے جس کے ذریعے فیس بک اور انسٹاگرام پر خودکشی سے متعلق پوسٹس کے بارے میں معلومات فوری پولیس کے ساتھ شیئر کی جاتی ہیں۔
پولیس کے مطابق یکم جنوری 2023 سے 31 مئی 2026 تک اس طرح کے انتباہات پر کارروائی سے پوری ریاست میں 3ہزار سے زائد لوگوں کی جانوں کو بچایا جاچکا ہے۔
Leave a Reply