اسلام آباد: حکومت کی تکنیکی کمیٹی کے پیپلز پارٹی سے مذاکرات کامیاب ہوگئے۔
نائب وزیراعظم اسحاق ڈار کی زیر صدارت تکنیکی کمیٹی کے گزشتہ روز پیپلز پارٹی سے کامیاب مذاکرات ہوئے جس میں آئندہ مالی سال کے بجٹ سے قبل اہم مالیاتی مفاہمت طے پاگئی۔
ذرائع کے مطابق وفاق کو آئندہ مالی سال کے ٹیکس ہدف کی اضافی رقم فراہم کی جائے گی اور قومی محاصل کی تقسیم کے لیے این ایف سی کے فارمولے میں تبدیلی نہیں ہوگی جس کے تحت وفاق رواں مالی سال کے ٹیکس ہدف پر آئندہ مالی سال صوبوں کو محاصل دے گا۔
ذرائع کا کہنا ہے کہ رواں مالی سال کی نسبت آئندہ مالی سال کے اضافی محاصل وفاق کو دیے جائیں گے جب کہ صوبے گرانٹس کے لیے وفاق کو اضافی محاصل فراہم کریں گے۔
ذرائع نے بتایا کہ رواں مالی سال کا ٹیکس 13005 اور آئندہ مالی سال کا ٹیکس ہدف 15264 ارب روپے ہوگا، آئندہ مالی سال کے لیے ٹیکس ہدف میں 2259 ارب روپے کا اضافہ ہوگا۔
ذرائع کے مطابق صوبے وفاق کو 1200 ارب روپے سے زائد کی رقم گرانٹس کی مد میں فراہم کریں گے جس کے بعد وفاق آئندہ چند سال میں یہ رقم صوبوں کو واپس کرے گا، وفاق کو آئندہ مالی سال میں پنجاب سے 620 ارب روپے فراہم کیے جانے کا امکان ہے جب کہ آئندہ مالی سال میں سندھ سے 310 ارب روپے وفاق کو دیے جانے کا امکان ہے۔
دیگر صوبوں کے حوالے سے ذرائع نے کہا کہ آئندہ بجٹ میں خیبرپختونخوا کے 180 ارب روپے وفاق کو دیے جاسکتے ہیں اور اگلے بجٹ میں بلوچستان کے 85 ارب روپے سے زائد وفاق کو دیے جاسکتے ہیں۔
Leave a Reply