بیوی نے اختلافات پر جہیز میں ملنے والی گاڑی فروخت کرنے پر شوہر کے خلاف لاہور ہائیکورٹ میں فراڈ کا مقدمہ درج کرا دیا۔
دوران سماعت عدالت نے ریمارکس دیے کہ بیوی نے شوہر کے پاس بطور امانت رکھوائی گئی گاڑی فروخت کرنے پر مقدمہ درج کرایا، ریکارڈ کے مطابق گاڑی بیوی کے نام تھی، شوہر محض استمعال کر رہا تھا۔
عدالت کا کہنا تھا درخواست گزار کے مطابق بیوی نے خاندانی تنازع پر مقدمہ درج کرایا، درخواستگزار کے مطابق بیوی نے سامان جہیز کا دعویٰ بھی فیملی کورٹ میں دائر کر رکھا ہے۔
لاہور ہائیکورٹ کے مطابق شکایت کنندہ نے خود فیملی کورٹ میں گاڑی کو جہیز کا سامان قرار دیا تھا، بیوی نے ایف آئی آر میں زیر التواء فیملی مقدمے کا ذکر نہیں کیا، ریکارڈ کے مطابق گاڑی اب بھی بیوی کے نام پر رجسٹرڈ ہے۔
عدالت نے کہا کہ مقدمہ میاں بیوی کے خراب تعلقات کا نتیجہ معلوم ہوتا ہے، ملزم تفتیش میں شامل ہو چکا ہے اور ریکارڈ پر کسی بدنیتی کا ثبوت نہیں ہے۔
لاہور ہائیکورٹ کے جسٹس طارق محمود باجوہ نے 2 لاکھ روپے کے مچلکوں کے عوض شہری کی عبوری ضمانت کنفرم کردی۔
Leave a Reply