بھارت: رہائشی عمارت کی لفٹ میں پھنس کر 7 سالہ بچہ دم گھنٹے سے جان کی بازی ہار گیا۔
بھارتی میڈیا کے مطابق یہ واقعہ شہر پونے کے سنہا گڑھ روڈ کے علاقے میں قائم ایک رہائشی عمارت میں پیش آیا۔
میڈیا رپورٹس میں بتایا گیا ہے کہ 7 سالہ بچہ شیونش شیلیش دھت معمول کے مطابق تقریباً رات 10 بجے کے قریب ہاؤسنگ سوسائٹی کے احاطے میں کھیل رہا تھا، اس دوران وہ مبینہ طور پر عمارت کی لفٹ میں داخل ہوا اور لفٹ کا بٹن دبایا۔
میڈیا رپوٹس میں مزید بتایا گیا ہے کہ لفٹ کا بٹن دبانے کے بعد لفٹ چلنا شروع ہوگئی تاہم لفٹ دوسری منزل پر پہنچنے سے پہلے ہی بیچ میں رک گئی، جس سے بچہ اندر پھنس گیا، جب شیونش کافی دیر تک گھر واپس نہیں آیا تو اس کے گھر والوں اور بلڈنگ کے دیگر رہائشیوں نے بچے کی تلاش شروع کی۔
میڈیا رپورٹس کے مطابق بچے کے لفٹ میں پھنسے ہونے کے شبہ پر پولیس اور فائر بریگیڈ کو اطلاع دی گئی جس کے بعد لفٹ کا دروازہ کھول کر بچے کی لاش کو باہر نکالا گیا۔
پولیس کی جانب سے خیال کیا جارہا ہے کہ بچے کی موت لفٹ میں ڈیڑھ گھنٹے تک پھنسنے کی وجہ سے ہوئی تاہم پولیس نے حادثاتی موت کی رپورٹ درج کر کے مزید تفتیش شروع کردی ہے۔
Leave a Reply