پاکستان کے نامور اداکار شان شاہد نے کہا ہےکہ پنجابی فلم کرنا ان کیلئے ایک بڑا چیلنج تھا۔
شان شاہد آج کل اپنی ٹیم کے ہمران نئی فلم ‘بلھا’ کی پروموشن میں مصروف ہیں جس کیلئے وہ مختلف پروگرامز میں شرکت کررہے ہیں۔
حال ہی میں اداکار نے ایک نجی ٹی وی سے نشر ہونے والے پروگرام میں شرکت کی جہاں انہوں نے اپنی فلم سمیت انڈسٹری کے حوالے سے گفتگو کی۔
شان شاہد نے کہا کہ ایک ہی طرح کی فلم نہیں ہونی چاہیے لیکن بدقسمتی سے بڑا ہو یا چھوٹا اداکار ہر کوئی رومانوی ہیرو بننا چاہتا ہے، ایکشن لوگ اس لیے نہیں کرنا چاہتے کیونکہ اس کی پروڈکشن مہنگی ہوتی ہے اور ایکشن بھی کرنا پڑتا ہے، جب تک اداکار خود کو ورساٹائل نہیں کرتا اس کیلئے اسکرپٹ محدود رہتی ہے۔
انہوں نے مزید کہا کہ جب میں امریکا سے پاکستان آیا تو میرے لیے سب سے بڑا چیلنج یہ ہی تھا کہ میں نے پنجابی فلم کیسے کرنی ہے، مجھے لگا میرے اندر یہ کمی ہے مجھے یہ کرنا ہے، مجھے پنجابی سیکھنی ہے، میں ایسے لوگوں میں رہا تو معلوم ہوا پنجاب کیا ہے، ان کا رہن سہن اٹھنا بیٹھنا کیا ہے، پنجابی لفظی طور پر تو ادا ہوجاتی ہے لیکن جسمانی طور پر کیسے استعمال ہوتی ہے یہ سب میں نے سیکھا۔
یاد رہے لیجنڈ اداکار شان شاہد کی فلم ‘بلھا’ عید کے روز ریلیز کی گئی تھی۔
ایکشن، تھرل اور ایڈونچر سے بھرپور پاکستانی فلم ‘بلھا’ نے ریلیز ہوتے ہی 2 دن میں 2 کروڑ روپے سے زائد کمائے۔
Leave a Reply