سری لنکا میں 15 فروری کو آئی سی سی مینز ٹی20 ورلڈ کپ میں بھارت کے خلاف پاکستان کی شکست کے بعد، سوشل میڈیا پر ایک ویڈیو گردش کرنے لگی جس میں یہ دعویٰ کیا گیا کہ پاکستان کے صوبہ بلوچستان میں بھارت کی جیت کا جشن منایا گیا۔
یہ دعویٰ غلط ہے۔ انٹرنیٹ پر گردش کرنے والا یہ کلپ حالیہ میچ سے متعلق نہیں ہے۔
دعویٰ
16 فروری کو ایک صارف نے فیس بک پر 30 سیکنڈ کی ایک ویڈیو پوسٹ کی جس کا کیپشن ہندی زبان میں تھا: ”بھارت کی جیت پر بلوچ عوام جشن میں ڈوبے ہوئے ہیں۔“ اس ویڈیو کو 700 سے زائد بار دیکھا گیا اور اسے 62 لائکس ملے۔
یہ کلپ ایکس (ٹوئٹر) پر بھی دیگر اکاؤنٹس پر شیئر کیا گیا تھا۔
حقیقت
انٹرنیٹ پر گردش کرنے والا یہ کلپ نہ تو بلوچستان میں ریکارڈ کیا گیا ہے اور نہ ہی اس کا بھارت اور پاکستان کے درمیان ہونے والے حالیہ میچ سے کوئی تعلق ہے۔
لاہور کی گورنمنٹ کالج یونیورسٹی میں شعبہ تاریخ کے اسسٹنٹ پروفیسر اور کلچر اینڈ ہیریٹیج سوسائٹی کے ایڈوائزر نور رحمان نےجیو فیکٹ چیک کو ٹیلی فون پر بتایا کہ یہ ویڈیو 23 جنوری کو یونیورسٹی کی حدود میں ریکارڈ کی گئی تھی، جو کہ 15 فروری کے میچ سے کافی عرصہ قبل کا وقت ہے۔
انہوں نے مزید بتایا کہ ویڈیو میں یونیورسٹی میں منعقد ہ لوہڑی کی ایک تقریب دکھائی گئی ہے، جس کا اہتمام سوسائٹی فار کلچر اینڈ ہیریٹیج ڈیپارٹمنٹ نے کیا تھا۔
مزید برآں، گوگل ریورس امیج سرچ کے ذریعےجیو فیکٹ چیک کو معلوم ہوا کہ اسی طرح کی ویڈیوز جنوری میں بھی انٹرنیٹ پر شیئر کی گئی تھیں، جو کہ بھارت اور پاکستان کے درمیان ٹی ٹوئنٹی میچ سے قبل کا وقت ہے۔ ان میں سے کچھ کلپس یہاں اور یہاں دیکھے جا سکتے ہیں۔
فیصلہ: انٹرنیٹ پر شیئر کی گئی ویڈیو گورنمنٹ کالج یونیورسٹی لاہور میں ہونے والی ایک تقریب کی ہے اور اس کا ٹی ٹوئنٹی ورلڈ کپ سے کوئی تعلق نہیں ہے۔
ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔ اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔
Leave a Reply