وزیراعلیٰ پنجاب مریم نواز نے وزیراعلیٰ خیبر پختونخوا سہیل آفریدی کو تنقید کا نشانہ بناتے ہوئے کہا ہے کہ کے پی حکومت سے جب ترقی کا سوال ہوتا ہے تو کہا جاتا ہے ہم نے آپ کو شعور دیا ، کیا شعور کسی کا پیٹ بھر سکتا ہے؟ کیا لوگ روٹی کی جگہ شعور کھائیں گے؟
راجن پور میں گرین بسوں کی افتتاحی تقریب سے خطاب میں مریم نواز نے وزیر اعلیٰ خیبر پختونخوا کو نشانے پر لیتے ہوئےکہا کہ جعلی حکومت وہ ہوتی ہے جو لوگوں کا حق اور ترقی کھا جاتی ہے۔
مریم نواز نے کہا کہ خیبرپختونخوا کی حکومت سے جب ترقی کا سوال ہوتا ہے تو وہ کہتے ہیں کہ ہم نے آپ کو شعور دیا ہے،کیا شعور کسی کا پیٹ بھرسکتا ہے،کیا شعور پر سفر کریں گے؟ کیا شعور کو روزگار کا ذریعہ بنائیں گے؟
وزیر اعلیٰ پنجاب مریم نواز نے کہا کہ کے پی میں ورکرز کیلئے شعور الگ اور حکمرانوں کے بچوں کے لیے شعور الگ ہے، جب تک آپ اپنے حکمرانوں سے سوال نہیں کریں گے ، وہ نکمے پن کا مظاہرہ کرتے رہیں گے۔
مریم نواز نے بانی پی ٹی آئی کو تنقید کا نشانہ بناتے ہوئے کہا کہ اپنے بچوں کو برطانیہ میں بٹھا کر کہتےہیں کہ پاکستان نہ آنا ،کہیں گرم ہوا نہ لگ جائے جبکہ ورکرکے بچوں کو آگ لگانے کہتے ہیں۔
انہوں نے کہا کہ وہ جہاز لے کر جاتی ہیں تو کسی منصوبے کا افتتاح کرتی ہیں ، یہ جہاز لے کر کہاں جائیں گے؟ اڈیالا میں جہاز نہیں اترا کرتے۔
وزیراعلیٰ پنجاب نے راجن پور میں گرین الیکٹرک بسوں کے منصوبے کا افتتاح بھی کیا۔
Leave a Reply