اگر آپ ایسے افراد کے ساتھ وقت گزارتے ہیں جو مسلسل مسائل پیدا کرنے کا باعث بنتے ہیں تو آپ کے لیے بری خبر ہے۔
جی ہاں ایسے مسائل پیدا کرنے والے یا زندگی مشکل بنانے والے افراد آپ کو قبل از وقت بڑھاپے کا شکار بنا دیتے ہیں۔
یہ دعویٰ ایک نئی طبی تحقیق میں سامنے آیا۔
جرنل پروسیڈنگز آف دی نیشنل اکیڈمی آف سائنسز میں شائع تحقیق میں بتایا گیا کہ جھگڑالو افراد سے تعلق صحت کو متاثر کرتا ہے جبکہ بڑھاپے کی جانب سفر تیز ہو جاتا ہے۔
تحقیق میں ایسے جھگڑالو افراد کےلیے مسائل پیدا کرنے والے یا زندگی مشکل بنانے والے افراد کی اصطلاح استعمال کی گئی۔
تحقیق میں دریافت کیا گیا کہ اکثر زندگی مشکل بنانے والے افراد سے رابطے میں رہنے سے تناؤ کی سطح بڑھتی ہے جبکہ حیاتیاتی عمر بڑھنے کی رفتار بھی بڑھ جاتی ہے۔
خیال رہے کہ ویسے تو ہر فرد کی عمر کا تعین تاریخ پیدائش (کرانیکل ایج) سے کیا جاتا ہے مگر طبی لحاظ سے ایک حیاتیاتی عمر (بائیولوجیکل ایج) بھی ہوتی ہے جو جسمانی اور ذہنی افعال کی عمر کے مطابق ہوتی ہے۔
جینز، طرز زندگی اور دیگر عناصر اس حیاتیاتی عمر پر اثرات مرتب کرتے ہیں اور یہ عمر جتنی زیادہ ہوگی مختلف امراض کا خطرہ بھی اتنا زیادہ بڑھ جائے گا۔
اس تحقیق میں 2 ہزار سے زائد افراد کے ڈیٹا کا تجزیہ کیا گیا جو ایک طبی سروے کا حصہ بنے تھے۔
ان افراد سے گزشتہ 6 ماہ کے دوران لوگوں سے تعلقات کے حوالے سے سوالات پوچھے گئے تھے اور معلوم کیا گیا تھا کہ کوئی فرد ان کی زندگی مشکل بنانے کا باعث بن رہا ہے۔
محققین نے ان افراد کے لعاب دہن کے نمونے اکٹھے کیے اور صحت سے متعلق تفصیلات حاصل کیں۔
نتائج سے معلوم ہوا کہ آپ کی زندگی میں ہر مشکل پیدا کرنے والے فرد کی موجودگی سے حیاتیاتی عمر میں 1.5 فیصد اضافہ ہو جاتا ہے۔
یعنی اگر آپ کی زندگی میں ایک سے زیادہ ایسے افراد موجود ہیں تو حیاتیاتی عمر کی رفتار مزید بڑھ جائے گی۔
محققین نے بتایا کہ بظاہر تو 1.5 فیصد اضافہ معمولی محسوس ہوتا ہے مگر وقت کے ساتھ یہ صحت کے لیے تباہ کن ثابت ہوتا ہے۔
انہوں نے تسلیم کیا کہ تحقیق کے نتائج کو ابھی ٹھوس قرار نہیں دیا جاسکتا کیونکہ ابھی تک وجہ ثابت نہیں کی جاسکی۔
انہوں نے کہا کہ ہم نہیں جانتے کہ زندگی مشکل بنانے والے افراد کیوں حیاتیاتی عمر میں اضافے کی وجہ بنتے ہیں، مگر بظاہر ایسا تناؤ بڑھنے کے باعث ہوتا ہے۔
تحقیق میں دریافت کیا گیا کہ مردوں کے مقابلے میں خواتین کو ایسے افراد کا سامنا زیادہ ہوتا ہے۔
محققین کے مطابق اکثر زندگی مشکل بنانے والے افراد خاندان سے ہی تعلق رکھتے ہیں اور ان سے دور رہنا مشکل ہوتا ہے۔
خاندان سے باہر دفتری ساتھی اور پڑوسیوں کو لوگوں کی جانب سے زیادہ زندگی مشکل بنانے والا قرار دیا جاتا ہے۔
Leave a Reply