عمر میں اضافے کے ساتھ دانتوں کی رنگت میں بتدریج تبدیل ہوتی ہے اور زرد رنگ نمایاں ہو جاتا ہے۔
عمر بڑھنے کے ساتھ دانت زیادہ زرد ہونے لگتے ہیں کیونکہ دانتوں کی اوپری سطح مٹنے لگتی ہے۔
مگر دانتوں کی زرد رنگت بیشتر افراد کو پسند نہیں آتی اور وہ انہیں سفید کرنے کے لیے ہزاروں روپے بھی خرچ کر دیتے ہیں۔
مگر اچھی بات یہ ہے کہ گھر میں رہتے ہوئے دانتوں کی زردی کو دور کرنا ممکن ہے۔
چند ٹپس کے ذریعے آپ دانتوں کی سفیدی کو بحال کرنے کی کوشش کرسکتے ہیں۔
بیکنگ سوڈا کا استعمال
بیکنگ سوڈا دانتوں کی سفیدی کے لیے بہترین سمجھا جاسکتا ہے جس کی وجہ اس کی اینٹی آکسائیڈنٹ خصوصیات ہیں۔
ایک کوارٹر چائے کے چمچ بیکنگ سوڈا کو پانی میں مکس کریں اور ٹوتھ برش کے ذریعے دانتوں پر لگائیں۔
اس سے بتدریج دانتوں کی پیلاہٹ کو ختم کرکے سفیدی بحال کرنے میں مدد ملتی ہے۔
اسٹرابیری بھی مددگار
اس پھل میں موجود میلک ایسڈ ایک قدرتی کلینر کا کردار ادا کرتا ہے۔
یہ پھل دانتوں کی سفیدی بحال کرنے میں مدد فراہم کرتا ہے۔
سیب کھائیں
سیب دانتوں کی صفائی کرنے والے بہترین فوڈز میں سے ایک ہے۔
اس پھل کی ساخت کچھ اس طرح کی ہے کہ اسے چبانے سے دانتوں میں جم جانے والی گندگی کو ہٹانے میں مدد ملتی ہے جبکہ اس میں موجود تیزابیت اس عمل کی رفتار تیز کرتا ہے۔
ناریل کے تیل سے مدد لیں
ایک چمچ ناریل کے تیل کو منہ میں بھر کر کچھ دیر تک کلی کی طرح حرکت دیں۔
ایسا کرنے سے بیکٹیریا الگ ہوجاتے ہیں اور گندگی سمیت دانتوں پر موجود داغ بتدریج نرم ہوکر الگ ہونے لگتے ہیں۔
کوئلہ
کوئلہ بھی دانتوں کی سفیدی میں مدد فراہم کر سکتا ہے۔
ایسا مانا جاتا ہے کہ کوئلے سے دانتوں پر سے داغ ہٹانے میں مدد ملتی ہے جبکہ منہ میں موجود بیکٹریا کا بھی خاتمہ ہوتا ہے۔
درحقیقت اب تو کوئلے پر مبنی متعدد ٹوتھ پیسٹ بھی دستیاب ہیں جس سے مدد لی جاسکتی ہے اور براہ راست کوئلے کو استعمال کرنے کی ضرورت نہیں۔
زیادہ پانی والے پھلوں یا سبزیوں کا استعمال
تربوز، خربوزے، کھیرے، ٹماٹر اور ایسے تمام پھلوں یا سبزیوں کا استعمال دانتوں کے لیے مفید ثابت ہو سکتا ہے جن میں پانی کی مقدار زیادہ ہوتی ہے۔
ان پھلوں یا سبزیوں کے استعمال سے منہ میں لعاب دہن کی مقدار بڑھتی ہے جس سے دانتوں میں پھنس جانے والے کھانے کے ذرات نکل جاتے ہیں اور نقصان دہ تیزابیت معدے میں پہنچ جاتی ہے۔
دانتوں پر برش
دانتوں کو سفید رکھنے اور زرد ہونے سے بچانے کا پہلا طریقہ تو یہی ہے کہ انہیں درست طریقے سے اکثر برش کیا جائے۔
دانتوں کو برش کرنا اس وقت ضروری ہوتا ہے جب ایسی غذاؤں اور مشروبات کا زیادہ استعمال کیا جائے جن سے دانتوں کی رنگت بدل جاتی ہے۔
مگر زیادہ تیزابیت والی غذاؤں اور مشروبات کے استعمال کے فوری بعد دانتوں پر برش کرنے سے گریز کرنا چاہیے کیونکہ ایسا کرنے سے دانتوں کی سطح تنزلی کا شکار ہونے لگتی ہے۔
دن میں کم از کم 2 بار 2 منٹ تک برش کرنا چاہیے۔
نوٹ: یہ مضمون طبی جریدوں میں شائع تفصیلات پر مبنی ہے، قارئین اس حوالے سے اپنے معالج سے بھی ضرور مشورہ کریں۔
Leave a Reply