چہل قدمی ایک سادہ اور آسان جسمانی سرگرمی ہے جو جسمانی فٹنس کو بہتر بنانے میں مدد فراہم کرتی ہے۔
مگر سوال یہ ہے کہ آخر روزانہ کتنے قدم چل کر آپ جسمانی وزن میں کمی لاسکتے ہیں؟
اس سوال کا جواب ایک نئی طبی تحقیق میں دیا گیا ہے۔
انٹرنیشنل جرنل آف انوائرمنٹل ریسرچ اینڈ پبلک ہیلتھ میں شائع تحقیق میں بتایا گیا کہ روزانہ 8500 قدم چلنے سے جسمانی وزن میں کمی لانے میں مدد مل سکتی ہے۔
اس تحقیق میں بتایا گیا کہ 80 فیصد افراد جو ڈائٹنگ کرکے جسمانی وزن میں کمی لاتے ہیں، وہ اسے برقرار نہیں رکھ پاتے اور کچھ عرصے بعد دوبارہ موٹاپے کے شکار ہو جاتے ہیں۔
اس تحقیق میں 3758 افراد پر ہونے والے 18 کلینیکل ٹرائلز کے ڈیٹا کا تجزیہ کیا گیا۔
یہ سب افراد زیادہ جسمانی وزن یا موٹاپے کے شکار تھے، جن میں سے 1987 کے طرز زندگی میں تبدیلیاں لائی گئی، 1771 کو صرف ڈائٹنگ کرنے کا کہا گیا یا کسی بھی قسم کی تبدیلی سے دور رکھا گیا۔
طرز زندگی میں تبدیلی لانے والے پروگرام میں شامل افراد کے لیے غذائی تجاویز اور زیادہ چلنے جیسے نکات تجویز کیے گئے۔
ان افراد کے قدموں کی تعداد کو ریکارڈ کیا گیا اور ایک سال تک ان کی صحت اور جسمانی وزن میں کمی کا مشاہدہ کیا گیا۔
نتائج سے معلوم ہوا کہ روزانہ 8500 قدم چلنے والے افراد کے جسمانی وزن میں اوسطاً 4.39 فیصد کمی آئی۔
اس عادات کو برقرار رکھنے سے کچھ عرصے بعد ان کے جسمانی وزن میں مزید 3.28 فیصد کمی آئی۔
مزید تجزیے سے قدموں کی تعداد میں اضافے اور جسمانی وزن کو مستحکم رکھنے میں ٹھوس تعلق ثابت ہوا۔
محققین نے بتایا کہ اگر آپ روزانہ 8500 قدم چلنا عادت بنالیں تو اس عادت سے جسمانی وزن میں کمی لانے اور اس کمی کو برقرار رکھنے میں مدد مل سکتی ہے۔
Leave a Reply