آئی فون سستی سے چارج ہو رہا ہے؟ تو ایک فیچر اس کی وجہ ہوسکتا ہے

کیا آپ کا آئی فون معمول سے زیادہ وقت میں چارج ہو رہا ہے یا یوں کہہ لیں سست چارجنگ کے مسئلے کا سامنا ہے؟

اگر ہاں تو ایسا آپ کے آئی فون میں کسی خرابی کی وجہ سے نہیں ہو رہا بلکہ کمپنی کی جانب سے کچھ عرصے متعارف کرایا گیا ایک فیچر اس کی وجہ ہے۔

ایپل کی جانب سے اکتوبر 2022 میں آئی او ایس 16.1 میں ایک فیچر کلین انرجی چارجنگ متعارف کرایا گیا تھا جو سست چارجنگ کا باعث بن رہا ہے۔

اس فیچر کا مقصد آئی فون چارجنگ کے دوران توانائی کے خرچ میں کمی لانا ہے تاکہ ماحولیاتی نقصانات کی روک تھام کی جاسکے۔

اس فیچر سے فون اس وقت چارج ہوتا ہے جب بجلی سے کاربن کا کم اخراج ہوتا ہے۔

جب آپ آئی فون کو چارجر پر لگاتے ہیں تو یہ فیچر مقامی گرڈ سے کاربن کے اخراج کی پیشگوئی کرتا ہے۔

اس کے بعد فون اس معلومات کو استعمال کرکے آئی فون کو اس وقت چارج کرتا ہے جب اسے ماحول دوست ذریعے سے توانائی ملتی ہے۔

تو اس فیچر کے باعث کچھ صارفین کے آئی فون کئی گھنٹوں تک بھی چارج نہیں ہوتے۔

یہ فیچر صرف مخصوص مقامات جیسے آپ کے گھر یا ان جگہوں پر ہی کام کرتا ہے جہاں آپ زیادہ وقت گزارتے ہیں اور فون کو دیر تک چارج کرتے ہیں۔

کسی نئی جگہ پر یہ فیچر کام نہیں کرتا۔

اس مسئلے کا حل بھی آسان ہے۔

ویسے تو یہ فیچر بائی ڈیفالٹ ان ایبل ہوتا ہے مگر آپ اسے آسانی سے ڈس ایبل کر سکتے ہیں۔

اس مقصد کے لیے سیٹنگز میں بیٹری کے آپشن میں جائیں اور وہاں بیٹری ہیلتھ اور پھر چارجنگ پر کلک کریں۔

وہاں نیچے کلین انرجی چارجنگ کا آپشن ہوگا جسے ٹرن آف کر دیں۔