دنیا کے پہلے کھرب پتی ایلون مسک کا گھر آپ کو دنگ کر دے گا

ایلون مسک دنیا کے پہلے کھرب پتی یا ٹریلین ائیر (ایک ہزار ارب ڈالرز دولت کے مالک) بن گئے ہیں۔

ایسا ان کی کمپنی اسپیس ایکس کے حصص عوام کے لیے فروخت پیش کرنے سے ہوا اور ایلون مسک کی دولت اب 1100 ارب ڈالرز سے تجاوز کرگئی ہے۔

تو دنیا کے امیر ترین شخص کا گھر بھی بہت زیادہ شاندار ہوگا؟ یہ تصور بیشتر افراد کے ذہنوں میں موجود ہے۔

مگر کیا واقعی یہ خیال درست ہے؟

حقیقت تو یہ ہے کہ ایلون مسک کا طرز زندگی بہت سادہ ہے اور دولت چاہے جتنی بھی ہو، ان کا گھر تو بہت ہی چھوٹا ہے۔

جی ہاں واقعی دنیا کے پہلے کھرب پتی ایلون مسک ٹیکساس میں بہت چھوٹے سے گھر میں رہتے ہیں۔

2020 میں ایلون مسک نے اپنے تمام 5 گھروں کو فروخت کرنے کا فیصلہ کیا تھا اور ٹیکساس کے علاقے Boca Chica میں 2 بیڈ رومز پر مشتمل گھر میں رہائش اختیار کرلی۔

خیال رہے کہ ایلون مسک نے مئی 2020 میں اعلان کیا تھا کہ وہ اپنے تمام گھر اور بیشتر اثاثوں کو فروخت کردیں گے تاکہ مریخ میں انسانی کالونی کے لیے سرمایہ کاری کرسکیں اور وہ زمین پر اپنے لیے کوئی گھر نہیں رکھیں گے۔

اس وقت سے وہ 50 ہزار ڈالرز کے ایک چھوٹے سے گھر میں مقیم ہیں جس کو انہوں نے اپنی کمپنی اسپیس ایکس سے ہی لیا ہے۔

ویسے تو آسٹن کے قریب انہیں بڑی جائیدادوں تک رسائی حاصل ہے مگر کئی بار کہہ چکے ہیں کہ وہ رہائش کے لیے اس چھوٹے گھر کو ہی ترجیح دیتے ہیں۔

ان کی والدہ نے مارچ 2026 میں اس گھر کی تصویر ایک ایکس (ٹوئٹر) پوسٹ میں شیئر کرتے ہوئے بتایا تھا کہ اس گھر کے فریج میں کھانا نہیں، میں خود اس کے گیراج میں سوئی تھی۔

دیگر تصاویر میں بھی ایلون مسک کے گھر کے اندرونی حصوں کو دیکھا جاسکتا ہے۔

ان کی والدہ کی شیئر کردہ تصویر میں ایلون مسک کے گھر کا کچن اور نشست گاہ کو دیکھا جا سکتا ہے۔

اس تصویر میں میز پر ایک تلوار، راکٹ کی شکل کی کوئی چیز اور مختلف گیمز نظر آرہی ہیں۔