اسرائیلی فوج نے جنوبی لبنان میں پیش قدمی کرتے ہوئے تاریخی الشقیف قلعے (Beaufort Castle) پر اپنا پرچم لہرا دیا۔
غیر ملکی خبرساں ایجنسی اے ایف پی کے مطابق قلعے کے اطراف گولہ باری کی آوازیں سنائی دیتی رہیں اور دھوئیں کے بادل اٹھتے دکھائی دیے جبکہ اسرائیلی فوج کا پرچم قلعے کے اوپر لہرایا گیا۔
ماضی میں اسرائیلی افواج لبنان پر اپنے دو دہائیوں طویل قبضے کے دوران اس قلعے کو ایک اڈے کے طورپر استعمال کر چکی ہیں۔
اسرائیلی وزیر دفاع اسرائیل کاٹز نے کہا کہ فوج نے اس تاریخی مقام پر قبضہ کر لیا ہے جو جنوبی لبنان کے وسیع علاقے پر نظر رکھنے کے لیے اسٹریٹجک اہمیت رکھتا ہے۔
الشقیف کی جانب پیش قدمی ایسے وقت میں کی گئی جب اسرائیلی فوج نے زہرانی دریا کے جنوب، دریائے لیطانی کے شمال اور اسرائیلی سرحد سے تقریباً 40 کلومیٹر دور تک کے علاقوں کے لیے بڑے پیمانے پر انخلا کا حکم جاری کیا۔
اسرائیلی وزیراعظم بنیامین نیتن یاہو نے کہا کہ الشقیف قلعے پر قبضہ لبنان میں حزب اللہ کے خلاف اسرائیل کی مہم میں ’ڈرامائی تبدیلی‘ کی علامت ہے۔
نیتن یاہو نے اپنے ویڈیو بیان میں کہا کہ ’آج ہم الشقیف میں ایک نئے انداز سے واپس آئے ہیں۔ ہم متحد، پرعزم اور پہلے سے زیادہ مضبوط ہو کر لوٹے ہیں‘۔
نیتن یاہو کا کہنا تھا کہ ’الشقیف پر قبضہ ہماری پالیسی میں ایک بڑا مرحلہ اور اہم تبدیلی ہے۔ ہم نے خوف کی دیوار توڑ دی ہے، اب ہم پہل کر رہے ہیں اور شام، غزہ اور لبنان ہر محاذ پر کارروائی کر رہے ہیں‘۔
Leave a Reply