اسرائیلی وزارت صحت نے تصدیق کی ہےکہ ایران سے جنگ شروع ہونے کے بعد سے اسرائیل میں 1900 سے زائد زخمی اسپتالوں میں داخل ہوچکے ہیں۔
اسرائیلی وزارت صحت کے مطابق 24 گھنٹوں میں 157 زخمی افراد کو اسپتال لایا گیاہے۔
اسرائیلی وزارت صحت نے 13 افراد کی ہلاکت کی تصدیق کی ہے اور بتایا ہے کہ زخمیوں میں سے 112 افراد ابھی بھی اسپتال میں داخل ہیں جن کی حالت تشویش ناک ہے۔
اسرائیلی ریسکیو سروسز کے مطابق اسرائیلی دارالحکومت تل ابیب پر ایرانی کے تازہ میزائل حملے میں 6 افراد زخمی ہوئے ہیں۔
پولیس حکام کے مطابق وسطی اسرائیل میں ایک درجن سے زائد مقامات پر میزائل یا اس کے ٹکڑے گرنے کی اطلاعات ملی ہیں۔ حکام کا کہنا ہے کہ مختلف مقامات پر ہونے والے اثرات سے اندازہ ہوتا ہے کہ ممکنہ طور پر ایرانی بیلسٹک میزائل میں کلسٹر بم وارہیڈ نصب تھا۔
دوسری جانب جنوبی لبنان میں لبنانی مزاحمتی تنظیم حزب اللہ کے حملے میں 2 اسرائیلی فوجی ہلاک ہوگئے۔
اسرائیلی فوج کے مطابق ہلاک ہونے والے فوجیوں میں سارجنٹ فرسٹ کلاس ماہر خطار اور ایک دوسرا فوجی شامل ہے جس کا نام بعد میں جاری کیا جائے گا۔
اسرائیلی میڈیا کے مطابق واقعہ جنوبی لبنان میں ایک فوجی چوکی کے قریب پیش آیا جو اسرائیلی سرحدی بستی منارا کے سامنے واقع ہے۔
ابتدائی فوجی تحقیقات کے مطابق علاقے میں کارروائی کے دوران ایک پیوما بکتر بند گاڑی کو نکالنے کے لیے فوج نے ایک اور پیوما بکتر بند گاڑی اور دو ڈی 9 بکتر بند بلڈوزر بھیجے۔
فوج کے مطابق بلڈوزروں میں سے ایک کو ایک گولہ لگا جو ممکنہ طور پر اینٹی ٹینک میزائل یا مارٹر تھا جس سے آگ بھڑک اٹھی اور دونوں فوجی ہلاک ہو گئے، اس واقعے میں ایک افسر معمولی زخمی بھی ہوا۔
Leave a Reply