ایرانی سپریم لیڈر آیت اللہ خامنہ ای کی شہادت پر کراچی میں مختلف سیاسی اور مذہبی جماعتوں کے رہنماؤں و قونصل جنرلز نے ایرانی قونصل خانے جاکر اظہار تعزیت کیا۔
وزیراعلیٰ سندھ مراد علی شاہ نےقونصل جنرل سے ملاقات میں کہا کہ ہم ایران کے خلاف جنگی جارحیت اور آیت اللہ سید علی خامنہ ای کی شہادت کے حوالے سے پوری ایرانی قوم کے ساتھ اظہار یکجہتی کرتے ہیں، ہم اس مشکل وقت میں ایران کے ساتھ کھڑے ہیں۔
گورنرسندھ کامران ٹیسوری نے کہا کہ آیت اللہ سید علی خامنہ کی شہادت عالم اسلام کا بہت عظیم نقصان ہے، ہزاروں سال بعد مائیں اپنے بچوں کو ایرانی قوم کی مزاحمت اور جدوجہد کی لازوال داستانیں سنائیں گی۔
سینیٹر رضا ربانی نے کہا کہ ایران کے سپریم لیڈر ایک انتہائی بابصیرت اور زمانہ شناس رہبر تھے، ان کی شہادت پہ ہر صاحب ضمیر دلگرفتہ اور رنجیدہ ہے۔
ادھر چین کے قونصل جنرل یانگ یودونگ نے کہا کہ امریکی کی پالیسیاں پورے خطے میں عدم استحکام کی موجب ہیں، ہم ایرانی سپریم لیڈر کی شہادت کے حوالے سے ایرانی قوم سے اظہار تعزیت کرتے ہیں ۔
ملائیشیا کے قونصل جنرل نے کہا کہ کسی خودمختار و آزاد ملک کی اعلیٰ قیادت کو نشانہ بنانا پورے خطے میں عدم استحکام کا باعث بنے گا۔
اس کے علاوہ وزیرثقافت سید ذوالفقار علی شاہ نے کہا کہ ہم پوری ایرانی قوم کو تعزیت پیش کرتے ہیں، ایران کے خلاف غیرقانونی جارحیت کی شدید مذمت کرتے ہیں۔
وزیرسید ریاض حسین شاہ نے کہا کہ آیت اللہ خامنہ ای نے ہمیشہ پوری امت مسلمہ کو اتحاد اور مزاحمت کا درس دیا جبکہ ترجمان سندھ حکومت سعدیہ تحسین عابدی نے بھی ایران پرحملے کوغیرقانونی جارحیت قراردیتے ہوئے مذمت کی اور کہا کہ ایران کے خلاف اسرائیلی جارحیت تمام بین الاقوامی قوانین و ضوابط کے خلاف ہے۔
ذوالفقار بھٹو جونیئر نے کہا کہ ایران ہمارا پڑوسی و اسلامی ملک ہے جس کے شانہ بشانہ کھڑا رہنا ہمارا حق بنتا ہے۔
مزید براں پی ٹی آئی رہنماؤں نے کہا کہ آیت اللہ سید علی خامنہ ای نے شجاعانہ شہادت پیش کر کے دین اسلام کی حقانیت کو ثابت کر دیا ہے۔
اس جت علاوہ مولانا شہنشاہ نقوی نے کہا کہ آیت اللہ سید علی خامنہ کی شہادت کا دن ہمارے لیے روز عاشورا سے کم نہیں تھا۔
علامہ ریاض نقوی، علامہ شیخ صلاح الدین اور تحریک بیداری امت مصطفی کے رہنماؤں نے بھی اظہار تعزیت کیا۔
Leave a Reply