پاکستان شوبز انڈسٹری سے وابستہ ماضی کی معروف اداکارہ فریال گوہر نے اپنی شادی سے متعلق گفتگو کی جس کی ویڈیو سوشل میڈیا پر وائرل ہے۔
حال ہی میں ماضی کی معروف جوڑی فریال گوہر اور ان کے سابق شوہر و معروف اداکار جمال شاہ نے نجی ٹی وی چینل کی رمضان ٹرانسمیشن میں ایک ساتھ شرکت کی۔
دورانِ انٹرویو انہوں نے ماضی کے حساس موضوعات پر نہایت سنجیدگی اور احترام کے ساتھ گفتگو کی۔
فریال گوہر نے کھل کر اپنے احساسات بیان کیے اور بعض مواقع پر واضح انداز اپنایا۔
ایک موقع پر جمال شاہ نے گفتگو کرتے ہوئے کہا کہ میں غصے کی حالت میں اپنی چیزیں توڑ دیتا ہوں، جس پر میزبان نے سوال کیا کہ کیا انہوں نے کبھی فریال گوہر کی چیزیں بھی توڑی تھیں؟ اس پر فریال گوہر نے برجستہ جواب دیا کہ میرا کبھی کچھ تھا ہی نہیں۔
بعد ازاں جب ماضی کے فیصلوں سے متعلق سوال کیا گیا تو فریال گوہر نے جمال شاہ کی جانب دیکھتے ہوئے کہا کہ ان سے شادی کرنا میری زندگی کا ایک غلط فیصلہ تھا۔
مذکورہ پروگرام کے مختصر ویڈیو کلپس سوشل میڈیا پر وائرل ہوئے تو یہ جملہ سوشل میڈیا پر بھی توجہ کا مرکز بن گیا اور پروگرام کے اس حصے نے ناظرین کو خاصا چونکا دیا۔
یہاں یہ بات بھی قابلِ ذکر ہے کہ میزبان کو ان دونوں کو ایک ساتھ پروگرام میں مدعو کرنے پر شدید تنقید کا سامنا ہے۔
واضح رہے کہ فریال گوہر اور جمال شاہ کو ماضی میں شوبز کی مثالی جوڑی سمجھا جاتا تھا تاہم 1992 میں ان کی راہیں جدا ہوگئیں۔
Leave a Reply