چیئرمین نیب کی تقرری کا معاملہ، پاکستان نے آئی ایم ایف سے ایکشن پلان شیئر کردیا

نیب چیئرمین کی تقرری کے طریقہ کار پر نظرِ ثانی کی جائے گی اور اسے وفاقی کابینہ کے سامنے غور کے لیے پیش کیا جائے گا۔ فوٹو فائل

اسلام آباد: پاکستان نے قومی احتساب بیورو (نیب) کے چیئرمین کی تقرری کے عمل کا جائزہ لینے، اعلیٰ سطح کے وفاقی سول سرونٹس کے اثاثہ جات کے گوشواروں کو 2026میں شائع کرنے اور اثاثوں کی خطرات پر مبنی تصدیق (رسک بیسڈ ویریفکیشن) کا نظام متعارف کرانے کے لیے ایک ایکشن پلان آئی ایم ایف کے ساتھ شیئر کر دیا ہے۔

نیب چیئرمین کی تقرری کے طریقہ کار پر نظرِ ثانی کی جائے گی اور اسے وفاقی کابینہ کے سامنے غور کے لیے پیش کیا جائے گا۔

آئی ایم ایف کا جائزہ مشن 25 فروری سے 11 مارچ 2026 تک پاکستان کا دورہ کرے گا تاکہ 7 ارب ڈالر کے ایکسٹینڈڈ فنڈ فیسلٹی (EFF) اور 1.4 ارب ڈالر کی ریزیلینس اینڈ سسٹین ایبلٹی فیسلٹی کے تحت کارکردگی کا جائزہ لیا جا سکے۔

طرز حکمرانی، بدعنوانی کی تشخیص اور کلیدی نگراں اداروں کے سربراہوں کی تقرری پر پاکستان کا ردعمل اور اسکی جانچ وفد دورے کا اہم مقصد ہوگا۔ میرٹ پر انتخاب کیلیے مسابقتی کمیشن، سیکیورٹیز اینڈ ایکسچینج کمیشن اور نیب جیسے اہم نگراں اداروں کے سربراہان کی تقرری کا قانونی فریم ورک مزید مؤثر بنایا جائے گااقدامات27 جون تک مکمل کیے جائیں گے۔

اس دورے کے دوران گورننس اینڈ کرپشن ڈائگناسٹکس (GCD) اسسمنٹ رپورٹ کے حوالے سے پاکستان کے اقدامات خصوصی توجہ کا مرکز ہوں گے۔پاکستان نے آئی ایم ایف سے اتفاق کیا ہے کہ مسابقتی کمیشن آف پاکستان (سی سی پی)، سیکیورٹیز اینڈ ایکسچینج کمیشن آف پاکستان (ایس ای سی پی) اور نیب جیسے اہم نگرانی کرنے والے اداروں کے سربراہان کی تقرری کے قانونی فریم ورک کا جائزہ لے کر اسے مزید مؤثر بنایا جائے گا تاکہ میرٹ پر مبنی انتخاب کو فروغ دیا جا سکے۔

ایس ای سی پی کے چیئرمین کی براہِ راست تقرری کے عمل کو مجوزہ ایس ای سی پی ترمیمی بل میں ضابطہ بند کیا گیا ہے، جس میں ایک سلیکشن کمیٹی کی تشکیل شامل ہے جو ممکنہ امیدواروں کی نشاندہی اور سفارش کرے گی، جبکہ وفاقی حکومت ان طریقہ کار کو باضابطہ بنانے کے لیے قواعد جاری کرے گی۔

ایس ای سی پی کے قواعد کا نوٹیفکیشن جاری کیا جائے گا جس میں چیئرمین، کمشنرز اور پالیسی بورڈ ممبران کی تقرری کا مکمل طریقہ کار اور مدت مکمل ہونے سے کم از کم تین ماہ قبل تقرری کے عمل کا آغاز شامل ہوگا۔

ایس ای سی پی پالیسی بورڈ سے منظور شدہ سالانہ گورننس اور شفافیت رپورٹ کی اشاعت، بہتر نگرانی اور قیادت کے خلا میں کمی کے اقدامات 27 جون تک مکمل کیے جائیں گے، جس سے ریگولیٹری استحکام، فیصلہ سازی میں تسلسل اور سرمایہ کاروں کے اعتماد میں اضافہ ہوگا۔

کمپیٹیشن ایکٹ 2010 میں ترمیم درکار ہوگی تاکہ چیئرپرسن کی علیحدہ اور خودمختار تقرری ممکن بنائی جا سکے۔

سی سی پی کے قواعد کا نوٹیفکیشن بھی جاری کیا جائے گا جس میں چیئرمین اور ممبران کی تقرری کا مکمل طریقہ کار، مدت ختم ہونے سے کم از کم تین ماہ قبل تقرری کا آغاز، اور کمیشن سے منظور شدہ سالانہ گورننس و شفافیت رپورٹ کی اشاعت شامل ہوگی۔

توقع ہے کہ 27 جون تک منڈیوں، بشمول اجناس کی منڈیوں، میں مسابقت کو یقینی بنانے کی مؤثریت میں اضافہ ہوگا۔

نیب چیئرمین کی تقرری کے عمل پر باضابطہ جائزہ مکمل ہونے کے بعد غور کیا جائے گا اور ضرورت پڑنے پر اقدامات کیے جائیں گے تاکہ 27 جون تک انسدادِ بدعنوانی ادارے کے طور پر نیب کی عوامی ساکھ میں اضافہ ہو۔