رات کو کھانے کا بہترین وقت کونسا ہے جس سے دل کی صحت کو فائدہ ہوتا ہے؟
اس سوال کا جواب ایک نئی طبی تحقیق میں سامنے آیا ہے۔
امریکا کی نارتھ ویسٹرن یونیورسٹی کی تحقیق میں بتایا گیا کہ رات کے کھانے کا وہ بہترین وقت کونسا ہوتا ہے جس سے دل اور میٹابولک صحت بہتر ہوتی ہے۔
تحقیق میں دریافت کیا گیا کہ درمیانی عمر کے افراد میں اس وقت دل اور میٹابولک امراض کا خطرہ بڑھتا ہے جب وہ رات کو سونے سے کچھ دیر قبل کھانا کھاتے ہیں۔
تحقیق کے مطابق سونے سے کم از کم 3 گھنٹے قبل رات کا کھانا کھانے سے دل اور میٹابولزم کی صحت کو بہتر بنانے میں مدد ملتی ہے۔
محققین نے بتایا کہ پوری رات کو بھوکا رہنے سے جسم کی اندرونی گھڑی کے افعال بہتر ہوتے ہیں جس سے دل، میٹابولزم اور نیند کو فائدہ ہوتا ہے۔
انہوں نے مزید بتایا کہ صرف اسی بات کو دیکھنا ضروری نہیں کہ آپ نے کتنی مقدار میں کھانا کھایا بلکہ یہ بھی ضروری ہے کہ آپ سونے سے کافی دیر قبل کھانا جزوبدن بنالیں۔
تحقیق میں شامل 90 فیصد افراد نے رات کے کھانے کے طے شدہ وقت کو اپنایا تو ان کی دل اور میٹابولزم کی صحت پر مثبت اثرات مرتب ہوئے۔
ساڑھے 7 ہفتے تک جاری رہنے والی تحقیق میں دیکھا گیا تھا کہ سونے سے 3 گھنٹے قبل کھانا کھانے والے افراد اور سونے سے کچھ دیر قبل کھانا کھانے سے صحت پر کیا اثرات مرتب ہوتے ہیں۔
تحقیق میں دریافت کیا گیا کہ سونے اور رات کے کھانے کے درمیان 3 گھنٹے کے وقفے سے رات کے وقت بلڈ پریشر کی سطح میں ساڑھے 3 فیصد اور دھڑکن کی رفتار میں 5 فیصد کمی آئی۔
تحقیق میں بتایا کہ یہ کمی دل کی صحت پر مثبت اثرات مرتب کرتی ہے۔
تحقیق میں 36 سے 75 سال کی عمر کے 39 ایسے افراد شامل کیے گئے تھے جن کا جسمانی وزن زیادہ تھا یا موٹاپے کے شکار تھے۔
ان افراد میں دن کے وقت بلڈ شوگر کی سطح بھی بہتر ہوئی اور لبلبہ زیادہ مؤثر طریقے سے کام کرنے لگا۔
اس تحقیق کے نتائج جرنل Arteriosclerosis, Thrombosis, and Vascular Biology میں شائع ہوئے۔
Leave a Reply