ٹیریان وائٹ کے بارے میں یلدا حکیم سے منسوب بیانات ڈیپ فیک ہیں

پاکستانی سوشل میڈیا پر گردش کرنے والی ایک ویڈیو میں مبینہ طور پر اسکائی نیوز کی صحافی یلدا حکیم کو یہ کہتے ہوئے دیکھا جا سکتا ہے کہ قیدِ تنہائی کا سامنا کرنے والے سابق وزیراعظم عمران خان کے بیٹے، قاسم اور سلیمان، پاکستان جانے کے لیے تیار تھے لیکن انہیں ٹیریان وائٹ نے روک دیا اور وہ اس وقت تک سفر کرنے پر تیار نہیں جب تک عمران خان اس (ٹیریان) سے بھی ملنے پر رضامند نہیں ہو جاتے۔

یہ دعویٰ بالکل غلط ہے۔ یلدا حکیم نے اس قسم کے کوئی ریمارکس (یا بیانات) نہیں دیے۔

دعویٰ

10 فروری کو حکمران جماعت پاکستان مسلم لیگ (ن) سے تعلق رکھنے والی پنجاب اسمبلی کی رکن حنا پرویز بٹ نے سوشل میڈیا پلیٹ فارم ایکس (جو پہلے ٹوئٹر کے نام سے جانا جاتا تھا) پر 59 سیکنڈ کا ایک ویڈیو کلپ پوسٹ کیا۔

ویڈیو کا کیپشن یہ تھا: ”یلدا حکیم نے ایک دلچسپ دعویٰ کیا ہے کہ بانی پی ٹی آئی (پاکستان تحریکِ انصاف) نے قاسم اور سلیمان کو پاکستان آنے اور ان سے ملاقات کرنے سے کیوں روک دیا ہے۔“

انہوں نے مزید کہا کہ یلدا حکیم کے اس انکشاف کے بعد پی ٹی آئی کا یہ دعویٰ غلط ثابت ہو گیا ہے کہ حکومتِ پاکستان قاسم اور سلیمان کو اپنے والد سے ملنے کے لیے آنے سے روک رہی ہے۔

اس مبینہ ویڈیو میں یلدا حکیم کو یہ کہتے ہوئے سنا جا سکتا ہے کہ قاسم اور سلیمان دونوں پاکستان جانے کے لیے تیار تھے، لیکن انہیں عمران خان کی مبینہ بیٹی ٹیریان وائٹ نے روک دیا، جنہوں نے اس بات پر بھی اصرار کیا کہ وہ (خود بھی) اپنے والد سے ملنا چاہتی ہیں۔

ویڈیو میں یلدا حکیم کو یہ کہتے ہوئے سنا جا سکتا ہے کہ: ”جب بیٹوں نے مسٹر عمران خان سے رابطہ کیا تو انہوں نے صاف انکار کر دیا اور کہا کہ اس سے (سیاسی) شور شرابہ پیدا ہو سکتا ہے، جس کی وجہ سے اب ہم یہ سن رہے ہیں کہ گولڈ اسمتھ خاندان کے درمیان جھگڑا چل رہا ہے اور قاسم اور سلیمان دونوں اپنی بہن ٹیریان کا ساتھ دے رہے ہیں۔“

اس آرٹیکل کے شائع کئے جانے کے وقت تک پوسٹ کو 9 ہزار سے زائد بار دیکھا، 99 مرتبہ لائک اور21 دفعہ ری پوسٹ کیا گیا۔

اسی طرح کے دعوے یہاں اور یہاں بھی شیئر کیے گئے ہیں۔

حقیقت

صحافی یلدا حکیم اور آزادانہ تصدیق سے یہ ثابت ہوا ہے کہ برطانوی پریزنٹر نے ایسا کوئی بیان نہیں دیا، اور ٹیریان وائٹ سے متعلقہ حصہ بعد میں یلدا حکیم کی ایک اصل ویڈیو میں ایڈٹ (ترمیم) کر کے شامل کیا گیا تھا۔

یلدا حکیم نے جیو فیکٹ چیک کو میسجز کے ذریعے بتایا کہ انٹرنیٹ پر گردش کرنے والا یہ کلپ جعلی ہے۔

اس کے علاوہ، جیو فیکٹ چیک نے 9 فروری کو اسکائی نیوز پر نشر ہونے والی مکمل 1 منٹ 38 سیکنڈ کی رپورٹ کا جائزہ لیا، جس میں صحافی (یلدا حکیم) نے عمران خان کے بیٹوں کی اپنے والد سے ملاقات کے لیے پاکستان کے ویزا کی درخواست کے بارے میں بات کی ہے۔

اس پوری رپورٹ میں انہوں نے کہیں بھی ٹیریان وائٹ کا ذکر نہیں کیا۔ انٹرنیٹ پر گردش کرنے والا یہ حصہ ڈیپ فیک ہے۔

یلدا حکیم کی اصل رپورٹ یہاں دیکھی جا سکتی ہے۔

مزید یہ کہ آرٹیفیشل انٹیلی جنس (AI) مواد کی شناخت کرنے والے پلیٹ فارم ہائیو ماڈریشن (Hive Moderation) نے اس ویڈیو کو 99.8 فیصد اسکور دیا ہے، جو اس بات کی نشاندہی کرتا ہے کہ یہ ویڈیو ممکنہ طور پر اے آئی (AI) کی مدد سے تیار کی گئی ہے۔

فیکٹ چیک: ٹیریان وائٹ کے بارے میں یلدا حکیم سے منسوب بیانات ڈیپ فیک ہیں — ہائیو ماڈریشن (Hive Moderation) کا ایک اسکرین شاٹ جس میں دکھایا گیا ہے کہ یہ ویڈیو اے آئی (AI) کے ذریعے تیار کی گئی ہے

فیصلہ: وائرل ہونے والی ویڈیو میں تحریف (Tampering) کی گئی ہے۔ مکمل رپورٹ میں یلدا حکیم نے کہیں بھی یہ نہیں کہا کہ قاسم اور سلیمان خان نے پاکستان آنے کا فیصلہ تبدیل کر لیا ہے یا انہوں نے عمران خان سے ملنے سے انکار کر دیا ہے۔

ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔ اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔

Source link