نیوزی لینڈ کے ایک اسکول کو کچھ ماہ سے عجیب مسئلے کا سامنا تھا کیونکہ وہاں سے تولیے، جوتے اور ملبوسات پراسرار طریقے سے غائب ہو رہے تھے۔
ایک سال سے زائد عرصے سے نیوزی لینڈ کے علاقے Whakatāne کے ایک اسکول کو ایک پراسرار چور کا سامنا تھا اور آخرکار انتظامیہ کیمرے میں اسے پکڑنے میں کامیاب ہوگئی اور دنگ رہ گئی۔
اس کی وجہ یہ تھی کہ یہ کوئی انسان نہیں بلکہ ایک بلی تھی۔
اسکول کی پرنسپل مراما اسٹیورٹ نے بتایا کہ گزشتہ ایک برس کے دوران اسکول سے چیزیں پراسرار طریقے سے غائب ہو رہی تھیں، خاص طور پر اس وقت جب سوئمنگ پول کو استعمال کیا جاتا تھا۔
انہوں نے بتایا کہ ‘شروع میں ہم نے جوتوں، سوئمنگ کے چشمے، لباس اور تولیے اسکول کے احاطے میں پایا’۔
اسکول کی جانب سے سوشل میڈیا پر ایک ویڈیو شیئر کی گئی جب چور ایک سکیورٹی کیمرے کی آنکھ میں محفوظ ہوگیا۔
ویڈیو میں دکھایا گیا کہ ایک سیاہ رنگ کی بلی ایک بڑے تولیے کو کھیل کے میدان میں گھسیٹ رہی ہے۔
مراما اسٹیورٹ نے بتایا کہ جب سوئمنگ کاسٹیوم اور تولیہ غائب ہوا تو عملے کی ایک فرد نے کیمروں کو چیک کیا اور چور کو پکڑ لیا۔
انہوں نے مزید بتایا کہ اسکول کے عملے نے بلی کے مالک سے رابطہ کیا جس نے تصدیق کی کہ ان کی پالتو بلی واقعی چیزیں چرا لیتی ہے۔
مراما اسٹیورٹ نے کہا کہ اس واقعے سے بچوں کو کافی کچھ سیکھنے کا موقع ملے گا۔
انہوں نے کہا کہ ‘میرے خیال میں ہم اپنے اسکول میں اس بلی کے بارے میں کافی پرمزاح کہانیاں تحریر کرسکتے ہیں اور ممکنہ طور پر بچوں کو یہ سمجھنے میں مدد ملے گی کہ اپنی چیزوں کو ہمیشہ بیگ میں رکھیں، چھوڑ کر نہ جائیں’۔
Leave a Reply